Gstartet hemmer euse Abschnitt dasmal mit de letzte Nacht imne Motel z Amerika, in Great Falls. Bimne Inder Pärli hemmer es Zimmer buecht. Kurz druff abe, nachdem mer im schäbige Zimmerli all eusi Sache ineta hend - meint d Putzfrau, mer söllet sofort wieder uschecke und ines anders Motel ga, sie heg na nie so es grusigs & verwarlosts Motel xeh! Gesagt getan, hemmer im andere Motel ichecket.
Deet simmer dänn au schön zur Rueh cho und händ chönne abefahre. Mer sind dänn am nächschte Tag ad Independence-Day Parade. De 4. Juli isch ja bi de Amis wie chli bi eus de 1. August. Es isch no luschtig gsi, aber meh e chli e "Werbigsparade" vo örtliche Gschäft mit es paar Flagge und Banner. S Füürwerk isch wege Brandgfahr verschobe worde.
Nach de Parade hämmer Kurs gno überd Gränze, da ja euses Visum uusgloffe isch (Scho 90 Täg verbii?!). De Zoll isch chli gsi und mir sind al einzigs Auto relativ rasch wiitercho. Doch es hät sich dänn schono zoge bis über d'Gränze. So hämmer dänn en Platz gsuecht zum schlafe. Mer händ dänn uf de Strass richtig Calgary en Campground gseh amene Flüssli, ohni Service für 25$... De Typ isch dänn go abkassiere cho nachdem mer s'Auto iigrichtet händ. Chli vill aber mer sind z'müed gsi zum dumm tue ;-)
Am nägschte Tag isches ufen Campground 10km westlich vo Calgary gange. De Calaway RV-Park isch grad näbedeme "Vergnüegigspark" (für chlini Chind..) und hät Platz für es paar Camper. Und wow, isch das iiiskalt xi i de Nacht! Was mer da nöd gnau gwüsst händ: Es isch grad de Afang gsi vom gröschte Festival und Ereignis in Calgary und vom gröschte Outdoor Ereignis vo de Wält (luut Reisefüehrer)--> Calgary Stampede!
E richtig grossi Chilbi miteme Stadion für Rodeos und Shows undere riise Halle mit jenschte Usstellige. De Afang hät e Parade gmacht vo öppe 3 Stund gange isch.
Aber richtig, richtig krass! Mit Wäge und Marschkapelle und Tänzer und Rössli und jenschtes.. 120 verschiedeni Gruppezüg. Das isch scho würklich cool gsi, au will die Orcheschter Lieder vo de Charts gspillt hät. Dänn tönt au d'Lady Gaga guet B-)
Nachher isches ab ufs Glände zu de Stampede.. ah nei moment, eus isch vorem gländ doch würklich en gratis Hotdog aabütet worde, gratis! Mer hät nöd gwüsst vo wem und wieso, aber es sind deet gedige alli Lüüt am mampfe gsi.
Okay, ebe.. De iitrit is Stampede isch 16$ gsi pro Person, s Rodeo hät dänn au wieder 12$ füren Stehplatz koschtet. Aber das hämmer leider scho verpasst, willmer no chli bi de Ussteller alles go aluege sind inkl. Schafschor-Wettbewerb und bide Schüssbudene gsi sind :) Es het den na zimmlich abelaa, mer hend zum Glück gad en Schärme gfunde. Am 6i am Abig simmer dänn wieder mitem Calaway Shuttle zrugg in Camp chauffiert worde.
De negschti Ort isch dänn Banff gsi, eine vo de bekanntere Parks in Kanada. Deet hämmer eigentlich 2 Täg chli welle ide Hot Springs (Warmi natürlichi Quälle) relaxe... Was mer aber nöd gwüsst hend, das bereits s Dorf Banff zum National Park ghört, und mer direkt vom Highway in Parkigang chunnt. Es het ca. 5 Kolone gha mit jenste Autos und vorne dra s Hüsli wommer de Itritt zahlt het. 9.80 pro Person für 1 1/2 Tag - für Banff & Jasper zeme. So simmer grad direkt zu de Hot Springs gfahre.
Nach dem mer aber bereits durs ganze Dorf im Stau gstande sind, wils eifach völlig überloffe xi isch, hemmer den umkehrt und sind mal richtig Picnic Area gfahre zum eus informiere wasmer alles wend / chan aluege. Denn hemmer eus entschide d Natur eifach chli z gnüsse und losfahre zum Lake Louise. De Park isch ufbaut mit 1nere doppelspurige Hauptstrass mit es paar Usfahrte. Aso mir sind ziemlich negativ überrascht xi, wie d Kanadier ihre Goldschatz wahret... denn z Amerika i de Pärks hemmer jewils nur so öbis wie e chlini näbestrass gha mit xxx Parkplätz und Scenic Views (Ussichtspünkt) und da hets eifach e halbi Autobahn dur en Nationalpark ohni jeglichi Ussichtspünkt sondern nur Usfahrte... das het eus denn chli abglöscht..
Janu bim Lake Louise ischs wiiter gange, wo parkieremer? En über 3
Ebene verteilte riisige Parkplatz isch pumpe volle xi, so dasmer grad de
best Platz packt hend. De See isch echt de oebrhammer... gnau so
wimmers sich vorstellt! Eifach unglaublich klars, türkisblaus Wasser mit
de wunderschöne idyllische Berge hinde dra. Es stört chli dases so
überloffe isch, aber ich glaub das isch det eifach so. Wiiter simmer de
Columbia Iceparkway derufgfahre richtig Jasper. Da mer aber weder igend
es Tier na sust öbis xeh hend oder hettet chöne go aluege, hemmer eus
entschiede bim Mosquito Creek Campground z Übernachte. De isch
wunderschön grad bimne Bächli gläge. So hemmer die 3t Nacht hinterenand
im Wald verbracht ohni Duschi und nur mit Plumsklo. Herrlich i de Nacht
die Sterne und Bäum z betrachte.
Am nächste Tag simmer
na zum Lake Herbert gfahre, det hets eus d Sprach verschlage, ihr
xehnds selber - lönds iiwürke! Es isch alles echt am Bild!
 |
| Lake Herbert |
 |
| Lake Herbert |
 |
| Lake Louise |
 |
| Lake Louise |
Per Zuefall simmer den na bi somne spezielle Tunnel dur de Berg
(Spiral Tunnel) verbigfahre womer grad de Zug xeh hend durefahre - d
Erfindig isch vo de Schwiizer =) Wiiter simmer dur de Yoho Nationalpark
gfahre, alles am Highway 1 entlang. (Transcanada Higway wo dur ganz
Kanada vo Ost nach West füehrt) Es het extrem idrücklichi Passagene debi
gha, dur jensti Päss simmer gschliche mit eusem Chärreli. Bim Glacier
National Park hemmer den en Stopp igleit zum en chline Spaziergang über
en wunderschöne Holzstäg z mache, z mitzt imnä Rägewald mit Farn und
allem drum & dra.
Ja, de Wäg het sich ziemlich zoge
vom Park bis uf Kamloops, so dass mer eus vonere Werbig
verleite lah hend. So hemmer binere Wolfuffangstation en Stop igleit und hend
2 jungi Wölf agüxxlet. Die sind im Ghäg xi mit 2 Wiitere grössere Wölf,
nebet dra hets namal 2 Arktischi Wölf gha. E sones Fraueli het eus denn
chli vo de Haltig und allem was si so machet verzellt.
In Salmon Arm hemmer öbis chlises z Mittag gässe im Mc, so en grusige Thaisalat. D Landschaft det erinneret extrem a die bi eus dihei, s het eus dünkt als würdemer am Vierwaldstättersee entlang fahre. Sust hets u viel schöni chlini Seeä mit Berge hintedra wimers kennt - s xeht us wie usem Bilderbuech. Es isch e sehr gmüetlichi Landschaft mitere extreme Wiiti. Ja und uf das abe simmer au scho in Kamloops acho und hend eus es Motel gno, wils echt chli z Kalt isch ufem Campground z pfuse, und hey - 30 Dollar für eigentlich nur en Parkplatz, wemmer es Motel für 55 überchömet - da mer wüsset wie, gönnemer eus ezt grad na 3 Nächt chli da im Motel Kings Motor Inn mit Hot Tube & Indoor Pool, es chlises Früehstück und grad nebet em Mc, Wendys, Burger King :)
Ah ja, vorher wommer im Wendys grad eusi herrliche Chillie Cheese Fries verdruckt hend, het plötzlich de Strom abgstellt, das en Autounfall gha hend ufem Highway - und ca. 4h hemmer eifach nix gha... so hemmer chli Stadt, Land, Fluss gspillt wie in guten alten Zeiten.
Z Kamloops hemmers eus nachli guet ga la, jede Tag chli im Pool & Whirlpool bädelet, gsünnelet und selbstverständlich am Abig schön grilliert. Denn simmer wiitergfahre uf Whistler, über ca. 3 Päss - es het amel so usxeh und isch immer rächt hertt deruf/derab gange. Verbigfahre simmer wider a de schönste Landschafte womer sich chan vorstelle. Eifach herrlich abgläge mit Seeä und Berge - idylle pur. In Whistler acho, hemmer eus grad wie i somne Touristekaff gfange gfühlt. Mit em Auto inefahre isch na ziemlich müehsam xi, wils sehr viel Mensche überall uf de Strasse gha het. S Dorf an und für sich isch ziemlich schön ufbaut. Es het so chli e Hauptstrass wo sich schöni Boutique und Restis & Bars entlangstrecket,wo sich au de Olympia Park befindet und s legendäre Olympia Zeiche. Sust ischs nüt speziells, halt schöni Seeä rundume und z mitzt i de Berge, aso mer chan sichs sehr guet ergaa lah mit all dene türe & chicce Resorts.
Da a dem Weekend, grad es Film Festival xi isch, sind d Hotels scho chli usbuecht xi, sodass mer grad uf Vancouver gfahre sind - rsp. Burnaby. Die Strecki isch de oberhammer xi. De Highway 99 füehrt die ganz Ziit a de Meeresbucht entlang und bütet en sehr idrücklich schöne Usblick - wie im Traum.
