Unser Trip quer durch Kanada und die U.S.A.: -15.07.12 Kamloops, Whistler, Vancouver

Soo, de letzti Blogiitrag vo de Noëmi, morn flügtsi schowider zrugg, sooo schnell isch die Ziit verbii gange.. eifach fiiiiiiis!!

Z Kamloops hemmers eus nachli guet ga la, jede Tag chli im Pool & Whirlpool bädelet, gsünnelet und selbstverständlich am Abig schön grilliert. Denn simmer wiitergfahre uf Whistler, über ca. 3 Päss - es het amel so usxeh und isch immer rächt hertt deruf/derab gange. Verbigfahre simmer wider a de schönste Landschafte womer sich chan vorstelle. Eifach herrlich abgläge mit Seeä und Berge - idylle pur. In Whistler acho, hemmer eus grad wie i somne Touristekaff gfange gfühlt. Mit em Auto inefahre isch na ziemlich müehsam xi, wils sehr viel Mensche überall uf de Strasse gha het. S Dorf an und für sich isch ziemlich schön ufbaut. Es het so chli e Hauptstrass wo sich schöni Boutique und Restis & Bars entlangstrecket,wo sich au de Olympia Park befindet und s legendäre Olympia Zeiche. Sust ischs nüt speziells, halt schöni Seeä rundume und z mitzt i de Berge, aso mer chan sichs sehr guet ergaa lah mit all dene türe & chicce Resorts.

Ufde Witerfahrt simmer na ufen Stop z Squamish stecke blibe, natürlich im A&W Burger, det hemmer eus so en mega galaktisch feine Little Buddy Burger with Cheese und himmlisch feine glasierte Zwible gönnt. Dem hemmer sit eusere erste Übernachtig mit em neue Auto in White Rock naträumt! De wird eus sehr fehle, ich glaub de mümmer im El Dorado z Rüti abüüte - das wird DE Renner!!!

Da a dem Weekend, grad es Film Festival xi isch, sind d Hotels scho chli usbuecht xi, sodass mer grad uf Vancouver gfahre sind - rsp. Burnaby. Die Strecki isch de oberhammer xi. De Highway 99 füehrt die ganz Ziit a de Meeresbucht entlang und bütet en sehr idrücklich schöne Usblick - wie im Traum.

Selbstverständlich simmer hüt na bi purem Sunneschii und ca. 24 Grad in Standley Park. Für das simmer dur ganz Burnaby und Vancouver City gfahre. D Stadt gfallt eus bi so Wetter/Temperature doch um einiges besser als womer da d Reis gstartet hend, wos na frostig kalt xi isch. D Lüt sind eifach viel chillier druff und au chli dusse am Lebe, aso s isch eigentlich doch ganz toll da. De Standley Park an und für sich isch riiesig. Mir sind zum Rosegarte,de Meerjungfrau, de Schiffsspitze, zum Third Beach und sust eifach chli umegloffe und de schön grüen Fleck gnosse. S Acquarium isch au grad dete, somit hemmer na e Show ghört :)

So, ezt morn wie xeit Flügt d Noemi hei und denn trifft da de Jürg, am Manu sin Vater ii, wo na 2 Wuche ufen Fischertrip verbichunnt. Ich hoffe eu hett de Blog gfalle & bis bald!