Unser Trip quer durch Kanada und die U.S.A.: 29.06. - 02.07.12 Sioux Falls/Badlands/Sturgis/Spearfish/Belle Fourche/Yellowstone

Lieber später als NIE!

Mir schribet euch, direkt usem nowhere vomne mega schöne Campground us...

Soo, wo simmer stah bliibe? Mer hend paar Nächt uf de Rest Area/Campground verbracht ohni WIFI..wunderschöön i de Natur usse, so herrlich das Amerika!

Afange mümmer na bi Sioux Falls, womer am letzte Tag na so richtig d VISA uf höchstand prüeft hend, und zum letzte mal i de USA fett sind go Shoppe - aso de Manu isch da sehr erfolgriich xi :)
Am Abig simmer zum Sioux Fall selber, det hends jewiils vo Wells Fargo us e Lightshow. Die zeigt d Gschicht vo de Stadt und d Fäll werdet schön farbig belüchtet, isch na zimmlich gmüetlich xi.

Uf de Heifahrt, Noemi het s Liecht nur uf Standart gha, aso nöd würklich agstellt, blinkts hinder eus mal wider... japs - again the Police... er frögt eus woher mer chömet,was mer da machet und ob ich xeh das mis Liecht nöd aisch.. ich verzell em d Story und er meint ich söll doch mal mituse cho.. schön und guet. Aso lauft d Noemi em Polizist hinde dri und de Manu muss im Auto warte. De Polizist findet ich söll doch bitte is Auto istige, lustigerwiis vorne ine - er befrögt mich namal chli und gaht den de Manu namal s gliche go Fröge... denn chunnt es wiiters Copauto und si belüchtet na de Kofferuum, denn besprächets z 3te hinderem 2te Wage igendöbisi wo sehr lustig het müsse si, wil ich has im Rückspiegel die ganz Ziit xeh lache :) Si lueget chli eusi Füehreruswiis ah, biser so 10min später wider zrugg zu mir is Auto chunnt und mal per Funk afrögt ob alles ok isch mit eus... Ja aber na klaaaaaaaar... ich ha i dere Ziit wunderbar schön chöne sis Auto inspiziere mit Frontkamera und jenstem guguus vo PC, Date, Chat und und und.. aso s isch sehr spannend xi. Zum Schluss frögter ober eus söll voruus fahre oder obmer de Weg kennet und das wars.... funny die lüüt =)

Guet next day simmer zum Badlands Nationalpark gfahre und hend eus wiedermal überrasche lah, wie wunderschön und vielfältig die Natur da isch.. eifach extrem idrücklich. Es wunderschöns Museum/Visitor Center mit u villne Infos womer sich chan hole.

Denn wiiter ischs gange zum Mount Rushmore, womer die 4 Köpf hend welle xeh :) Acho ufem högerli obe mit chli wenig Power vo eusem Silverstar hends fürs Parking unmenge viel bazzeli vo eus welle, sodasmers eifach vo de Strass une gnosse und gfötelet hend.

Pfuset hemmer den uf de Rest Area und am nächste Tag simmer uf Sturgis ine, es chlises Städtli wos grad per Zuefall en Chevrolet Camaro Usstellig gha hend - soo schön die alte Chärre!! Im August wird die Stadt überloffe womne Harley Davidson Träff/Motorcycle/Biker.

am gliche Tag simmer uf Spearfish via en Byrout wo chli so en Scenic Drive, also en schöni Route i de Natur usse isch, det hemmer de Roughlock Fall bestunet, wiiter simmer ine Fischufzucht, womer d Fisch het chöne i jedem Alter aluege und füettere. Nachli im Park relaxet und im kalte Bach d Füessli bädelet, simmer am Abig na is Kino go Ted luege.

Uf de Restarea übernachtet sind vor eusem Auto im Feld usse 3 Reh verbispaziert, simmer am nächste Tag uf Belle Fourche, det hent es Rodeo Festival stattgfunde. Mer hend jensti Tricks und Wettkämpf verfolgt, aber s eigentliche Rodeo isch denn erst am 7ni losgange und das isch leider nüm ide Ziit gläge.

Denn mer sind wiitergfahre, jawohl wiiter wiiter und wiiiiiiiiiiiiiter - bismer denn igendwenn via Rout 14 vo Sheridan nach Cody gfahre sind. Das isch au e sehr bekannti und sehenswerti Route über en Pass. Ufegschliche mit eusem Chärreli, hemmer doch glatt na en Elch xeh - was für es highlight!

In Cody hemmer ufem Campground übernachtet, dasmer denn am nächste Tag grad in Yellowstone hend chönne. Da ja bim erste Mal de halb Park na im Winterschlaf xi isch - hemmer eus das na im Summer welle aluege. Und es isch de oberoberoberhammer xi. Mer hend bi de Ifahrt grad en Grizzly Bär xeh und das extrem näch bi de Strass zue. Wiiiter hemmer na en Wapiti Hirsch miit Gweih atroffe, e Bissonfamilie ufem freie Fäld, Chipmunks, und en ADLER überem freie Lake Yellowstone und e Amish Familie uf Ihrem Usflug, aber ohni Kutsche, und viele warmi Quälle so Terrassene sowie Springbök. Aber gange simmer ja wegem Old Faithful - und das isch ezt würklich eifach de HIT zum so en Geysir mal live z erlebe! Denn hemmer na en Wanderig gmacht zum Lower/Upper Fall, Wasserfall mitere 600feet höhedistanz, das isch ja asträngend xi. Aber de Usblick und die Wassergwalt und d Schlucht womer xeht isch eifach wiedermal super TOP! Ezt simmer ufem Weg richtig Kanada/Calgary, und wieder ufem Campground i somne Käffli, wos 3 Tankstelle, und ein megachline Esslade het aber mit Hotsprings.