21./22.06.12 / Wisconsin Dells, Sioux Falls

We re back for you... =)

Nach dem mer nach Chicago, bimne verregnete morge ufgstande sind - isch klar xi, dasmer leider nöd in Six Flags Park - Great America gönd, das 1. regnet & 2. am Manu sin Arm nanig guet zwäg isch (tennis oder golfarm) drum simmer losgfahre in richtig neui Destination. Ufem Plan isch gstande s Auto Kino in Wisconsin Dells, nach knapp 4h Fahrt und emne meeega krasse Unfall. Plötzlich staut sichs zmitzt uf de Strass, guet das isch gar nüt neus das het mer immer echli z Amerika - so wie die umerösslet!! Ja, mer hofft denn nur dass de hindereim rechziitig bremst und mer nöd allzulang i de Hitz muss staufahre, aber gottseidank hemmer en zueverlässige Automat. Zrugg zum Unfall, eigentlich isch uf eusere Strassesiite gar nüt xi, es het eifach gstaut will all gluegt hend - es isch es Auto vollkomme usbrennt am andere Strasserand gstande, und d Führwehr het en riiisigi Flächi vo Gras i de Mitti vo beidne Fahrbahne müsse s Füüür lösche, lego mio das het ja ta, ca. 3 Führwehrauto und 3-4 Auto wo kaputt nebetdra gstande sind, aso mer hend zwar kein Liichesack xeh - aber de im usbrennte Auto het wohl chum überlebt, und das git eim z denke... da fahrt mer nüm gern wiiter...Uf de andere Strassesiite sinds nachher sicher 5km agstande :(

Häsli im Garte, statt de Pool wo sött funktioniere aber sit 2Jahr usser Betrieb isch :)

Wil da z Amerika, fahrt jede wie en völlig wirre Auto, mer wird vo allne siite überholt (was da legal isch) und es fahret all sicher immer 10 Miles schneller. Klar bi eus macht mer das au, aber wenn den nur so 10km/h ;) Ok, guet Acho nach dem Erlebnis simmer is Städtli vo Wisconsin Dells, das isch gnau glich ufbaut wie Pigeon Forge - aso ei turifalle nach de andere a einere Hauptstrass. Mer sind chli hin & her gloffe zum Ziitvertribe bismer uf di 8ti is Openair Autokino hend chöne.

Da mer nachli meh Ziit förig gha hend, simmer wider zum Wal Mart gfahre zum chli umeluege. Es het nebet dra en Kohls gha, de hemmer nöd kennt aso simmer inegange. Es isch eigenlich gnau en Manor, nur d Priise sind im Verhältnis zu da extrem tüür - für es normals Shirt 30 USD, und e bekannti Marke isches ja nöd. Denn simmer wiiter is Home Depot, das isch gnau s gliche wie es Bauhaus. Dete hemmer eus die katastrophale Fenster agluegt wos da hend :)

Acho bim Autokino, hemmer d Wahl gha obmer Screen 1: Rock of Ages/Prometheus oder Screen 2: Madagascar/Man in Black 3 hend welle go luege, und wenner ufpasst hend - wüsseder was mer usgsuecht hend ??? =) jaaaaaaa, genau Man in Black hemmer scho xeh... und wo isch das xi? ja, glaubet eus, das mümmer eus immer erst paar Sekunde überlegge, es isch Charlotte xi. Drum hemmer natürlich Screen 1 usgsuecht, es het nur 8USD/Person kostet, was für en super Deal.
Für s Auto het mer 4-5 Reihe womers direkt vor de riisig Bildschirm chan stelle und via Radiofrequenz chammer den de Ton empfange... das isch voll genial! S isch eifach es mega lässigs Erlebnis xi, im Auto inehocke, Chips oder M&M inebiige, und warte bis es gnueg dunkel isch zum de Film inezieh. Aso eus hend leider beid nöd so zuexeit und s isch den erst geg di 2h am Morge fertig xi, so dasmer grad wiiter gfahre sind richtig nächst Destination: Sioux Falls.

Ja, so isch d Noemi wiiterdüset, mer hend denn mal en Stop gmacht uf de Rest Area und hend chli döset, da ich nöd han chöne pfuse, bini denn aber zimmlich gli mal gad wider wiitergfahre. Sobald ich aber chli müed worde bin simmer wider uf di nächst Rest Area go pfuse. Ca. 3h später am morge am 5i bini den wiiter gfahre, da de Weg total 6h 40 xi isch und ich gar kei Lust gha han zum i de Hitz fahre hanis gad durezoge. S het recht wenig verkahr gha und s isch e herrlichi Stimmig xi dur die Landschaft z fahre. Mit em passende Rock Sender bini au zimlich guet zwäg xi. Glaub chli zu guet, denn ich bin ca. 130 statt 112, gfahre - so dass ich plötzlich es blinke im Hintergrund wahrgno han... oooojee, hemmer denkt - was het das wohl für Konsequenze? Rechts usegfahre chunnt en sympatische Officer und frögt obi gmerkt han, dasi chli z schnell unterwegs xi bin? Ich antworte: Ja has grad gmerkt. Er verlangt de Füehrerschii und d Autopapier, mer strecketem eifach mal alles here und er gaht zrugg zu sim Polizeiauto (Dodge Ram) laht eus sicher 5 Minute warte... seehr langi gfühlti 5Minute sind das xi.. ihr glaubet ja nöd wiie lang sich die agfühlt hend... er chunnt also zrug und git eus d Papier und en Verwiis. Er seit es het kei Konsequenze wils s erste mal xi isch wos mich registriert hend, aber d Adresse vom Fahrzüg seg aso scho chli komisch, de Manu seg gar nöd uf die Registriert... Er hets aber so xeit eifach als nette Hiiwis, gar nöd Cheffemässig oder so ;) Mer merkt, mer sind zmitzt ufem Land :) Wiiter meinter, dasmer keis Duftteil döft ufghänkt ha in Minnesota, und keis Navi z mitzt inne döf hange. Voll de flott Typ, er frögt eus na wasmer so machet und womer hiigönd etc. Denn ischer wider gange de Herr Officer Anthony Kaiser.

Wiiter simmer gfahre, für eus ischs es zimlich lustigs Erläbnis xi, wil mer hend ja na 2 Buesse offe - aber denke wils imne andere Staat isch, channer da nüt mache;) und mer hend ja gwüsst dasmer Minnesota nur grad chli durfahret aso vo dem her.... chli später druffabe simmer in Sioux Falls im Value Place acho, womer ezt 1 Wuche namal chli Chillet, d Fäll gönd go aluege, namal richtig Shoppet und eus erholet, bevors denn scho langsam wider über d Grenze nach Kanada gaht, und denn ab nach Hause...

Im Wal Mart, hemmer euse Wucheikauf grad gstartet, da hememr eusne Auge nöd traut. Mögeter Eu erinnere, die liebi Dame in Holland het eus xeit mer söllet uf de Farmers Markt ga, wil dete viel Amish People umelaufet... ja denkste die sind nöd z xeh xii... leider.. uf em Weg dahere, hemmer jensti Amishläde xeh wos Amish Furniture (Möbel) verkaufet, aber d Lüt selber hemmer nie xeh... bis genau - de moment im WAL MART!!!!! Ich han das selbstverständlich für eu festghalte:

19./20.06.12 - Chicago

Soo liebe Leute, alles hät klappet, mer sind wieder us Holland Michigan usecho und inere neue stadt undeme neue Staat aacho: Chicago, Illinois.

okay mit e chli verzögerig, mer sind nämlich öppe 1,5 Stund im Stau gstande. Also öppe 4,5h statt 3 stunde fahrt. Aberdie 36 Grad und 5000 Schweisstropfe schaded ja nöd...oder? :S Uf all Fäll simmer grad is Hotelzimmer, zum e chli abchüehle und dänn früeh go schlafe. Ach und um ein Tag hemmer de M. Romney verpasst - er isch grad uf sinnere Bus tour und macht en Stop in Holland.

Am nechschte Morge simer nachere Packig Swissrolls und eme Kaffi mitem Shuttle ad Metrostation gfahre worde. Mit de blaue Linie simmer dänn au grad ab id Stadt. Und mer sind sehr überrascht gsi. Chicago hat sehr vill z'biete, isch suuber und mindeschtens genauso idrucksvoll wie New York vo de Hochhüser ;-)

Mer sind dänn in Millenium Park, womer die bekannt Chicago-Spiegel-Bohne aatrifft. Es richtigs Touristemagnet. Aber es isch au würklich cool das Ding! Dänn wiiter simmer no chli im Park umegloffe miteme Live (!) Orchester wo eim mit klassische Musig chli underhalte hät. Wiiter simmer no am Navy Pier gsi, de Vergnüegigsegge miteme Zirkus, Ässe und vill, vill Wasser :-) D'Skyline gseht vom Pier grad nomal hübscher us! Nachere feine und sättigende Deep Dish Peperoni Pizza im Ristorante Due, simmer via Magnifique Street/Michigan Avenue dur d Shopping Strass gschlenderet entlang am Chicago River.

Wiiter hämmer no es paar Kunst-Skulpture betrachtet wo in Chicago höch agsehe sind.

Alles in allem isch Chicago mini (Manu) neu Lieblingsstadt worde!

18.06.12 / Holland

So, nachdemmer ezt knapp es Wücheli rueh vom ganze Reise gnosse hend hemmer doch na paar Sache erlebt womer gern mit eu wend teile.

Zwar simmer in Wall Mart go e Fischerlizenz löse für 4 Täg, denn simmer jewiils 15min ane Bucht gfahre, wo grad vorem grosse See isch. Dete het de Manu 3 Täg gfischt und d Noemi het chli gsünnelet und zuegluegt. Leider hemmer det kei Glück gha. Am Tag 2 hemmer denn Bekanntschaft mitere Dame gmacht wo mitem Hund isch go laufe - sie het eus paar gheimtipps gä, wos am beste sött ga zum Fisch fange... aber au die insider tipps hend eus kei glück bracht.

 Am Tag 3 hemmer sie denn namal atroffe und hend chli mit Ihre gredet, denn het si eus chli d Umgebig erklärt, sie het eus sogar abotte dasmer ihri Kayak chönd hole - si wohnt grad i de gegend mer chönds uslehne... =) Uf Ihre Tipp hi simmer am Samstig an Local Farmers Markt, womer all frische Frücht, Fleisch, Nuddle grad direkt vo de Farmer chan bezieh. Dete hettet au paar Amish Lüt sölle sii, die hemmer aber nöd xeh. Denn hememr na imne grosse Buechlade en halt gmacht wo sich de Manu es paar real American Comics kauft het. Sust simmer chli dur s Downtown gloffe  und na richtig Holland State Park gfahre, hend denn aber kein Halt gmacht damer d Badhose ned debi gha hend unds am Samstig sooo viel Lüt gha het.

Am letzte Tag mit de Lizenz simmer den mal anen andere Ort go fische, bim Vorsee vom Lake Michigan. Mir sind erst so uf di 8ti gange, denn am Namittag chillets d Fischli ja au chli, denn wends eusi Würmli nöd packe. Nach 2-3h am Pier hocke, und Music vom In - Restaurant gnüsse hemmer denn öbbe welle zemepacke. Da chunt en Latino mit sim Sohn a euse Platz und frögt ober au chli da chan Fische... natürlich, de See isch ja gross - grad nebet eus bi de nächste Ussichtsplattform hets es Chinesli mit sinere Frau gha wo mit 4 Profiroute am fische xi isch, die gönd ja ab du.




Ja wie xeit, mir hend grad welle ipacke - da zupfts a eusem Fade, de Manu ischs grad go abchecke und tadaaaaaaaa - mer hend aso würklich eine draa ghaa :) En 45cm lange Channel Cat fish. De Manu hetten den usgno und am nächste Tag hemmeren zuebreitet und verspiese.


Ezt hüt isch leider scho de letzt Tag da in Holland i eusem Value Place, morn gömmer für 2 Nächt nach Chicago, denn wiiter schowider in richtig Grenze... cu guys

11./12./13.06.12 - Erie Lake, Sandusky, Holland (MI)

Mir sind bereits wieder über de Gränze, de Gränzwächter isch locker gsi und hät eus stressfrei durelah, sodass mer grad richtig Buffalo gfahre sind. Alles am Eriesee, eine vo de grosse See i Nordamerika. Deet simmer ei Nacht imene Motel in Sandusky blibe womer dänn eus e chli uf di wiiteri Reis vorbereitet händ. Mer sind dänn no miteme Take Away Chinese Package an Hafe gange und deet chli ghöcklet bis zum Sunneundergang. Dänn isch eus promt e Wassermokassinottere entgäge gschwumme...Scary :P

Mir händ etzt en Platz gfunde wo optimal isch. Es Zimmer im "Value Place" es Motel für längeri Ufenthalt mit Chochnische in Holland, Michigan am Lake Michigan. Da hämmer eus iigrichtet und sind au scho chli go d'Nachberschaft erkunde.

Rund ums Motel häts jenschti Läde, wie de Walmart, womer au grad no euse Wucheiichauf gmacht händ, Chleiderläde und ander Spezialaabieter. De grossi See isch 10km entfernt und ganz easy z'erreiche. Mer bügt vom Parkplatz rächts ab ufe gradi Strass und chunt direkt an See.

Mer sind au scho go fische und chli an Strand ghängt. Es chunt eim vor wie am Atlantik, es windet immer e chli und es isch ab und zue no frisch. Aber de See isch unglaublich riesig.

S Motelzimmer sälber isch super gmüetlich, mit TV, Choschnische, grosse Chüelschrank miteme Iisfach. Dezue kauft hämmer no Internet für 10$ und Chochgschirr für 29$. Für 7 Nächt es Total vo 330$, da chammer nöd viel säge bi dere Lag :)

Mir gnüssed die Wuche e chli Michigan und ziehnd euses Programm dure (Sanddüne Boarde, Bowle, Openair-Auto-Kino, Chöchele etc.)

Wänns öppis spannends git, werdeder g'updated und d'Föteli stellemer under de Wuche no i de Blogg! ;-)

See y'all

07.-10.06.12 - Toronto, Niagara Falls

Hey liebi, treui Blogverfolger

Mir sind für es paar Täg uf Toronto gange, det hemmer unterschlupf bi bekannte vo de Noemi ihrem Götti gfunde - bim Ruedi & de Brigitte. Die zwei hend eus meega lieb und heimelig empfange und sich sehr guet um eus gsorgt.
Tag 1 in Toronto, het eus de Ruedi gad an Bahnhof gfahre und zeigt & erklärt wimer am beste und sicherste id Stadt inechömet. Mir sind mitem Regiozug inegfahre und hend bi de hifahrt s herrliche Panorama vo de Stadt gnosse.



Denn simmer bi de Union Station acho, das isch de Hauptbahnhof. Det simmer am afang grad chli verlore xi, wils überall am baue sind und um eus ume nur riisigi hochhüüser gstande sind.
Aber da mer de CN Tower vo überall grad xeht simmer grad mal zu dem losgstüüret. Denn hemmer s Flying Jays Stadion agüxxlet und sind mer via Konzerthalle "Roy Thomas Hall" durs Financial District mit de grosse Hochhüser vo z.B. KPMG, Deloitte, UBS, Manulife gloffe. Wiiter ischs gange zu de Young Street zum Downtown. dets hets links und rechts viel lädeli und Restis.

 Wies de zuefall so will, wimmer bim Eaton Center glandet - es riisigs Shoppingcenter. Und vorne dra hends en Square herebaut, wo chli a de vo NY oder London erinneret. Als Zueschaueruffangstation hends grad s Batmobile usgstellt gha und igend e Band het en Song zum Beste gä. Ja, denn simmer zu de City Hall gloffe wos agfange het tröpfle unds eus rächt verregnet het. Denn simmer mitem Zug zruggfahre. De Ruedi het eus s Znacht scho parat gmacht, s het feine Ufschnitt und en super Salat gä, mit Laugebrötli und Cervelat :) bald druf abe isch au d Brigitte heicho und mer hend en glatte Abig gha.

Tag 2:
Simmer direkt mit de Subway vo Warden gad bi ihne dihei bi Scarborough id Stadt inegfahre - mit de Ubahn gahts aso chli länger als mit em Regiozug. Det hemmer 4 Token kauft dh. mer het 4 fahrte. In Yorkdale simmer usgstige und durch die Vornehme Boutique und chiccä Restaurants gschlenderet. Es isch sehr es schöns district au mit emne Pärkli und viiiel grüen. Denn ischs wiiter gange zum Uni gländ, wos paar schöni alti Hüser und Chile hät, und en meeeeeega schöne Park womer eus es Päusli gönnt hend. Nebet dra sind na paar Mädels i schöne Kleider am Apero neh xi, isch wohl irgend e Prüefig grad dure xi.

Dur de Brigitte ihre Tipp simmer na de PATH abgloffe, das isch en Untergrundweg mit 28km, wo vo dem Dundas Square bis füre zu de Union Station. Und überall findet mer da Shops und Foodcourts wo mir den grad öbis chlises z Mittaggässe hend. Kurz druff abe simmer zum Harbor abe, wo direkt bim Lake Ontario isch. Det unde hends au so e chlini Konzertarena ufgstellt wos im Summer jewils am Weekend chli Fästli machet. Uf di 5i hemmer den d Brigitte vor ihrem Büro troffe und sind zeme heigange. Dihei het de Ruedi eus scho Spaghetti mitere Special feine Tomatesauce kochet gha, mer hend nurna döfe hisitze.
Eus ischs guet gange :)

Zum Dessert hets na wunderbar feini Macademia- Wiisischoggi guetzli mitemne feine Kaffi gä. Nach dem feine Mahl simmer den zum de Abig usklinge la na ines Pärkli gloffe wo sie fast vorem Hus hend, wo direkt an Lake Ontario agränzt. Wemmer dete in Horizont luegt, schiints als würd mer ufs Meer luege, unglaublich die Wiiiti! Bim idunkle hemmer na e Eule entdeckt. D Waschbärli hend sich leider nöd blicke lah, defür umso meh Eichhörndli.

Tag 3:
Nachem Usschlafe simmer am Samstig is Dörfli füregloffe wos en Flohmarkt gha het - wo de Ruedi sini beste Stück scho früeh am Morge isch go poste, hemmer ufem hiweg gad d Brigitte abgfange und si het eus chli umegfüehrt umene risige Parkplatz hend all Ihre Schnigg Schnagg verkauft. Denn simmer wider richtig zrugg gloffe, wo denn na en Garage Sale stattgfunde het, wimers us de Film kennt. Wo jede sini Sache vor d Garage stellt und versuecht z verkaufe oder z tusche oder wie au immer... Wiiter simmer gange zu Lick's go en meeeeeeeega feine Burger esse, das isch ezt wüki mal en Burger xi mitmne riise Stuck fleisch dine wo unglaublich super gwürzt xi isch - mmmmmmmmmmjamh. Am Abig simmer Yorkville ikaufzentrum gfahre, womer na en Abstecher is Kino gmacht hend zum the Dictator luege. 

Tag 4:
Am morge hemmer öbis luuts ghört womer ufgstande sind - es sind grad 40 Kanadawildgäns über eus verbigfloge, mir selber hends nur ghört aber de Ruedi hets verusse beobachtet. Denn hemmer zeme z morge gesse und hend eus au schowider müsse verabschiide. Mir sind wiitergfahre zu de Niagarafäll. Dur am Ruedi sin Tipp simmer direkt zum grosse Turm gfahre, womer es Parkplätzli zune humane Priis vo 7 USD gfunde hend. Und mer hends chum chöne erwarte, die erste Blick hemmer scho bi de Hifahrt zu de Fäll erhascht...

 

ATEMBERAUBEND  - unglaublich iidrücklich, schön, befreiend und eifach de oberhammer. 57 Meter fallts Wasser i riiise Ströme durab und mir stönd eifach direkt nebet dra.. und im Wasser unde isch eifach es Entli am tauche und isch chli am kämpfe xi i dem Getobe. Mir sind zrugg gfahre uf Amerika, problemlos über d Grenze cho und sind ezt ufem Weg zum Lake Michigan

***namal es ganz herzlichs DANKESCHÖN ad Brigitte & Ruedi für die super Gastfründschaft***

05/06.06.12 - Montreal, Ottawa, Kingston

Nach Boston simmer wieder ziemlich zackig  a de kanadische Gränze gsi wommer, andersch wie bi de amerikanische Gränze, ziemlich elei bim Zoll gstande sind. Es paar Frage wohere mer gönd etc. und scho isches wiiter gange. S'erschte Motel womer gseh händ, simmer dänn au grad go aquatsche. Es isch ziemlich idyllisch ufem Land gläge, ohni Nachbershüser mit rustikale Holzböde, also rächt herzig. Au de Priis vo 50 CAN$ isch okay, wämmer dänkt das i dem Land wieder anderi Priise herrsched.

Nach de ruhige und sehr erholsame Nacht simmer am Morge uf Montréal inegfahre. Damer in New York so ganz easy de Park and Ride händ chönne neh, hämmer dänkt das gaat da au so locker. Aber womer dänn uf Brossard inefgfahre sind, hätmer schomal gmerkt, dases viel Verchehr hät. I de Station sälber häts 958 Parkplätz gha, womer nöd ein leere gfunde händ, also hämmer de Silverstar eifach ufeme Chundeparkplatz vomene Grossgschäft näbedraa abgstellt.

Mitem Bus simmer dänn eigentlich rächt schnäll inecho (3.20/Person) und händ grad chönne zu de Ubahn Station Buenaventure laufe. De Tagespass isch da au öppe 8 CAN$ also glich wie i de amerikanische Grosstädt. Mer händ dänn grad de erschti vo eusne 4,5 Pünkt avisiert, nämlich s'olympische Stadion a de Station Pie-IX, Vieau. Deet hine sind grad es paar Sehenswürdigkeite:

-s'ebe erwähnte olympische Stadion mit allne Nebedgebäude. Mer chan au inegaa und s'Wasserbecki für d'Wassersportler aaluege. Isch rächt gross deet ine, au mit Tribüne.

- De Biodome, wird brucht für Uusstellige und Museum

- De "Tour Montréal", en luschtig schräg baute Turm, womer mitem Bähnli für vill Gäld chan ufefahre und bim "Observatoire" en schöne Usblick über d'Stadt gnüsse. (Was sich nöd lohnt, damer vom Mont Royal gnauso guet chan uf d'Stadt abeluege)

- Und schliesslich no de Jardin Botanique, en Garte mit Insektezoo.

Isch alles sehr schön, und suuber aber ebe, mer chan da sin ganze Lohn ligge lah zum alli Türmli und Hüüsli gnauer aaluege.

De nägschti Trip isch e chli i d'Bei gange. Mitem Bus simmer dän vo de Station "Mont Royal" zum glichnamige Berg ufe gfahre. Wämmer obe aachunt, glaubt mer zerscht nöd so rächt, was da speziell söll sii. Aber nach 10 min. laufe chunt mer uf d'Uussichtsplattform.

Und mer gseht würklich alles, d'Stahl und Isebrugge vo Montréal, de See und au di moderne Hochhüüser.






Ufem Berg sälber gits au no es Chrüüz womer au nach es paar Kilometer Fuessmarsch erreicht. Das isch aber tagsdur nöd so speziell. I de Nacht lüüchtets, dänn sölls besser si.




 

 Nachdem simmer no uf Oldtown gange, womer di alte Gebäude und Chile gseht.

Nach dere Stadt hämmer wieder ufere Raststätt pennt und sind dänn am negschte Tag i d'Hauptstadt vo Kanada, Ottawa gange. Mit 800'000 Iwohner isches e rächt chlini Stadt im verglich zu de Nachbere. S'iidrucksvollste vo de Stadt isch sicher s'Parlamentsgebäude.

 Dänn au de Park mit Blick uf de See, wo au d'Gschicht staht wie das früehner muss gsi si, wo d'Lüüt no mitem Kanu ufe und aber gfahre sind zum Ihri Sache handle. Dänn s'Kunstmuseum mit de Bronzespinne (Die häts au emal in Züri gä, wer sich mag erinnere, am Bürkliplatz) und es paar Plätz.

Nach Ottawa simmer dänn südlich richtig Toronto gfahre, womer in Kingston (de ehemalige Hauptstadt vo Kanada) halt gmacht händ zum e chli relaxe und öppis ässe am Hafe. Ziemlich gmüetlich deet, au mitem schöne Ratshuus.

Euse negscht halt isch Toronto, di gröscht Stadt vo ganz Kanda...

stay on-line