06.05. - 08.05.12 - Houston, Baton Rouge, New Orleans

So nachdem mer vo Texas losgfahre sind, hemmer eus entschlosse Houston uszlaah und direkt uf Louisiana - Baton Rouge z fahre. Das isch e super entscheidig xi... denn s wichtigste vo Houston hemmer xeh nämlich d Skyline by night. Somit simmer bi agnehme Temperature dur d Nacht uf Baton Rouge gfahre, ca. 7h. Dadebii hemmer na ca. 45m im Stau müsse warte, wils en Unfall gha het. S komische isch - dass mer nüt meh xeh het und vom eint uf ander Augeblick het chöne vollgas wiiterfahre. Denke die ruumet gad alles suuber uf & gäbet d Strass wider frei. So simmer ezt inere ganz andere Welt acho. S isch wider grüen und s Wetter fühlt sich nüm ganz so krass warm ah wie in Texas.

Mitemne leere Mage simmer in Applebees go z mittag esse, das isch chli öbis bessers als en MC, eigentlich s gliiche Prinzip wie euse lieblings Lade s Dennys. Mer chan herehocke i so alti urchigi sitzbänk wimmers kennt i de USA und het e Spiischarte und wird fründlich bedient. Nur hemmer so en leere Mage gha, dasmer am liebste gad alles gässe hettet. Ja, mer wird nöd enttüscht - für  USD 30 total hemmer beid voll die hammer frische, göttliche, feine Burger übercho mit echtem super Fleisch, Pommes und refill Getränk. D Lüt da sind mega offe & nett, mer chunnt gad immer sofort chli mit ihne is Gspröch. Womer is Resti inegloffe sind hend eus all nett begrüesst und den hemmer chli mitm Kellner gredet und er het eus ganz guet unterhalte. S isch sehr locker da.

Denn simmer id Stadt inegfahre, hend s Oldcapitol xeh, sind chli umegloffe, s schöns alts Postgebäude hemmer na xeh, am Riverwalk simmer xi wo direkt am Mississippi liit. Zudem hemmer nacher na s neue Capitolgebäude xeh und sind gad volle hahne verregnet worde. Aber en agnehme warme gmüetliche Rege.

Wiiter simmer am nächste Tag richtig Vacherie, go Kolonialhüser aluege - s Oak Alley isch euse favorit und wohl au de unter de Amerikaner. Es mega schöns riisigs Huus mit extrem viel Land rundume. Denn simer au scho chli später in New Orleans acho und hend unterwegs ufere riise Brugg nebet so tümmpeli de erst Alligator entdeckt. Ja und ezt gömmer d Stadt go agüxxle.
 Aktualisiert

Nachdem mer eus e chli vom fahre erholt händ simmer id Stadt inegfahre, is berüehmte "French Quarter", das Viertel mit viel Charme, Musig und au Rotliecht und Neon-Reklame. Mir händ dänn z'mitz ine parkiert und sind richtig Mississippi gloffe. Bim Spanish-Plaza am Riverwalk in New Orleans häts au jenschti Restaurants und natürlich all mit feinem Cajun, Creolischem oder au Amerikanischem Food. Sehr beliebt isch deet Seafood, will all d'Chrebsli oder d Chatzewels usem Fluss ässed. Mer händ dänn sone "Seafood Platter" für $ 14 proebiert, und es schmöckt würklich traumhaft! Das ganze hämmer im Kaffi Beignet gässe, verusse mit Live-Jazz...also richtig New Orleans. Aber vorher simmer no usem French Quarter und is Business District zu de grosse Gebäude mit de Shoppingmeile und eme riesige Stadion, NO-Superdome. Das Stadion isch währendem Hurrikan Katarina zur Uffangstation worde.

Übrigens hät de Sturm so einiges mit sich bracht. Mer gseht wie sich d Wirtschaft langsam erhole mues, d'Strasse sind no kaputt a de einte Stelle und vill Läde sind dicht. Au gseht mer das bi de Kriminalität. New Orleans isch sitem Sturm immer i de Top 3 vo de gföhrlischte Städt vo de Staate. Mit Chicago und Detroit isch NO bis jetzt meischtens Platz 1 gsi.

Aber das ganze natürlich nöd i de Touristeviertel. Ab ad Bourbon-Street, womer au us jedere Irishe Kneipe Live-Musig ghört, wo's überall Luxus-Seafood Restaurants hät und wo d'Cabarets (ja Cabaret, nöd Stripclub, New Orleans isch e französischi Kolonie) ihre Platz händ.

Nacheme Kaffi undeme Pecan Pie imene wiitere Jazz-Kaffihüüsli simmer dänn nacheme iidunkle wieder richtig Motel 6 gfahre.

Jetzt gaats die negschte zwei Täg richtig Miami-Beach. Leider werdemer wahrschinlich bis zum 10. kein Blogg chönne schribe, aber bliibet trotzdem dra!