29./30.05.12 - Washington zum Ersten und zum Zweiten

Tag 1:

Jaa mir sind in in Alexandria acho, e Stadt churz vor de Hauptstadt vo de U.S.A. Als erschts hämmer wieder eusi Sache im Hotelzimmer uusbreitet und sind nacher mitem vom Hotel zur Verfüegig gstellte Shuttlebus ad Metrostation gfahre.




Tagespass glöst, wo eus $9 koschtet hät. Und ab is Presidänteheim. Mer merkt scho vo de Ändstation vo de U-Bahn, dass alles ziemlich suber isch. Und au, zumindescht i eusere Region alles sicher. Das isch aber nöd immer so gsi. Washington D.C. isch vor nöd allzu langer Ziit i de Top 3 vo de gföhrlischte U.S.-Städt gsi. Vo deet hät si au de Spitzname "Murder Capital" becho. Hüt hät sich die ganzi Szene in Nord-Oste vo de Stadt verlageret, so dass d'Touris eigentlich nüd devo mitbechömed.

Womer a de Station L'Enfant Plaza uusgstige sind, hämmer zerscht nöd richtig gwüsst wohere. Aber wämmer emal e chli lauft gseht mers grad wienen Kolloss wo sich vor eim in Himmel ufe ragt. S'Washington Monument und s'State Capitol. Als erschts hämmer weltberüehmte Capitol (isch ja eigentlich alles wältberüehmt deet:-) in aagriff gno. Und ja würklich, es isch en Gigant vomene Gebäude, fascht e chli provozierend vo de Amerikaner. Aber ebe doch es architektonischs Meischterwerk. Riesigi Süüle stützed s'Muurwerk und d'Marmorfassade. Überall Securities mitere AK47 bewaffnet. Wotmer uf d'Stäge stah wird mer sofort verwiese, nöd ein Tritt dörf mer neh.

Hinderem Capitol isch no de Supreme Court, es Gebäude wo sich d'Legislative abspillt. Und grad no als Aahang, keis Huus dörf grösser si als s'Capitol bis ufs Washington Monument. Das gseht mer au wännmer Vorem Capitol staht vis-à-vis i öppe 2km entfernt.

Mer sind dänn i richtig dem riese Turm gloffe und das zieht sich... Aber uf de strecki ligged d'Smithsonian Museene und au en Botanical garden. Eis vo de bekanntischte Museene isch s'Air and Space Museum. Wills verusse gschätzti 180 Grad warm gsi isch, mir am verschwitze und im Muesum en Mc D gha hät, simmer eus chli go abchüele.

  

 

 

De Itritt i allne Muese in D.C. isch gratis. Und nur scho i de Iigangshall gseht mer wie gross dases isch. Es wird sich mit de Ruumfahrt, de Aafäng vo de Flugzüüg wie au mitem Universum an und für sich befasst. Es isch sehr spannend, wämmer d' Apollo 13 vor sich hät und näbedbii en Film zeigt wird wie es Shuttle abhebt, oder de erschti Mänsch ufem Mond glandet isch. Mer chan sich ziemnlich driifühle. S'gliiche au bi de erschte "Flugzüüg" vo de Gebrüeder Wright. E Luft Variante vomene Bobbycar isch dazumals de Pionier gsi, hät sich aber innerhalb vo 100 Jahr zum dem entwickled wo mir hüt händ.

Dänn simmer no en IMAX-Streife go luege, wo s'riesige Weltruum Teleskop Hubble zeigt wird. Und ja, en Tip vo eus, gönd das mal im Wikipedia go läse. Das Teleskop hät Bilder gmacht vo sterbende Sterne, anderne Galaxie Billione Liechtjahr eweg. Es isch sogar dur s'Hubble möglich worde, s'alter vom Universum uuszrächne (!).

Guet, nach soovill Informationsüberfluss isch mer au e chli müed und drum hämmer eus uf de Weg zum Monument gmacht womer nöd mues überlegge und nur chan luege ;-)

S'Monumetn isch au wieder sones riese Ding, dasmer scho bim ufeluege Höheangscht bechunt. Wiiterhine isch dänn grad au no d'Chriegsgedänkstätte und wiiter hine s'Abraham Lincoln Memorial. De kännt sicher jede, de Typ wo uf sim Stüehli hockt. Aber fakt isch, das de ehemalig Präsidänt sehr vill erreicht hät i sinere Amtsziit. Jaja mer verwiised wiedermal uf Wikipedia.

Nach dem simmer no is "W" Washington ine Rooftop Bar ghöcklet und händ en Kaffi und en Cheescake gnosse. Leider ischs dänn spöter richtig richtig go abeschütte cho, dasmer eus nümme troche händ chönne is Hotelzimmer rette. Di nasse Chleider und die schmerzende Bei vom laufe händ sich aber uf jede Fall glohnt!

Tag 2:

Mit Muskelkaater i de bei ufgwachet, s'Früehstücksbuffet vom DaysInn gstürmt und wieder ab uf Downtown. Hüt isch de riesig Friedhof vo Arlington euses erschte ziil gsi. Mit de Metro direkt erreichbar, liiter vom Fluss trännend vor Washington D.C. Alles volle Blüemli und amerikanischi Fläggli, es überbleibsel vom Memorial Day. Wiisi Grabstei soo wiit wiemer nur gseht, ca. 260 000. I jedem de Name und de militärisch Rang iigraviert, erinneret de Friedhof a die Ziite im Chrieg, wo vill Lüüt für Amerika gstorbe sind...es isch scho e riese Verschwendig. Am oberschte Punkt, s'Grab vom John F. Kennedy, mitere immerbrännende Fackle.

Als nächschst simmer bi de Station Chinatown, Gallery Plaza uusgstige zum is Smithsonian National Museum of Art go luege. Si händ deet nämlich e ganz spezielli Uustellig gha: The Art of Videogames! Yes! :-)

Mega luschtig gmacht, gsehtmer di erschte Konsole vo Atari mit de Games und wie sich das ganze wiiterentwicklet über de Nintendo 64 bis zu de Playstation 3. Immer mit Games vo 4 verschiedene Genere (Action, Adventure, Strategy etc.) Wiiter häts au Artworks, also Zeichnige vo de Entwickler über die im game vorkommende Protagonischte.

 Dänn häts natürlich au Games ghaa zum Uusprobiere =) Super Mario, s'ganz alte isch natürlich bi allne beliebt gsi. Und au Pacman dörf nöd fehle. Dur die Uustellig wot s'Smithsonian uf d'Kunst i de Videogames ufmerksam mache und au d'Nichtspieler devo überzüüge.

S'negschte Muesum isch, nacheme z'Mittag bim Chines, s'National Museum of Natural History gsi. Wieder e riesigi Iigangshalle mit verschiedene Abteilige: Dinosaurier und Fossilie, Säugetier, Insekte, Meerestier und de Ozean, eifach alles. Au wieder mit vielne Film und interaktive Sache.

 So händ's zum Biispil en ächte Fisch usgstellt, wo 1960 gfange worde isch. D'Forscher händ bis dahin glaubt das de Fisch scho sit 65 Millione Jahr usgstorbe isch. Und das Viech gseht au no so uus als wärs grad vo deet cho.

Und süscht au vill spannendi Sache, aber ich glaube , d Bilder spräched für sich.

Nachdem simmer hei go wösche... Bis dänn :)