Losgfahre simmer vo New Orleans richtig Mobile, womer d Skyline xeh hend und übere riisigi Brugg gfahre sind wiiter nach nach Tallahassi. S Zmorge, Zmittagässe hemmer bim Dairy Queen (DQ) gno, wos au mega feini Burger git. Denn simmer verusse ghöklet und hend gspiise, wo eus es Büebli isch cho fröge, obmer chli Wassermelone wend. Hey meega lieb, eifach e frischi halbi Wassermelone zum Dessert. Det i de nöchi hets na en Hafe gha womer nachli umegloffe sind, aso s git wüki mega schöni versteckti Plätz da i de USA. Pfuset hemmer unterwegs im Auto ufere Restarea. Es isch aber sooo warm xii dasmer d Türe hend müsse offe lah. In Tallahassi hemmer eus es super z Morge im IHOP gönnt, das isch spezialisiert uf Panncakes. Die hend au so wie s Dennys oder s Applebees e Karte mit Bedienservice - und soooo feins züg :) En Stopp hemmer den na bim Adventure Golf (Minigolf) mit de Pirate igleit. Für 13.- chammer uf 36 Bahne sis glück probiere, und d Usstattig natürlich vom feinste. Denn simmer chli ade Meeresküste wiitergfahre bisme denn in Jacksonvill acho sind. Dete simmer dank de Points of Interest wo de Manu ufs Navi glade het - zumne Windhundrenne gstosse. Die hend jede Tag 2-3mal täglich Windhündrenne. Mit 8 Hünd pro Start à 14 Ränne... das isch doch e Unterhaltig. Uf all fäll simmer sehr fründlich begrüesst und ufklärt worde. Denn hemmer natürlich uf die einte Hünd gsetzt. De Mindistisatz isch USD 2.- womer chan uf Win setze dh. mer wettet direkt uf ein Hund. Mer het so es Programm womer am Start für 1 USD chan poste wo all Hünd mit Statistike ufgfüehrt dinestönd, a hand vo dere chammer sis Hündli ussueche. Gesagt- getan für 20 USD hemmer 5 Rundene gwettet. Das isch es mega erläbnis xi, eifach mal die Atmosphere so es riisigs Stadion nur für die Hünd, mit de amerikanische Hymne sinds vorgstellt und an Start bracht worde. Bis denn s Häsli d rundi gmacht het und bi ihne s Törli göffnet worde isch - unds Renne losgange isch. Denn het eus de Speaker na persönlich willkomme gheisse: Welcome from very far far away Manuel & Noemi from Switzerland, Welcome to Florida.
Mit em Isatz vo 20 USD het d Noemi mit em einte Hund USD 29.40 usegholt, so dass mer namal 2 Rundene gwettet hend, det het denn de eint gunne und mer hend na USD 3.80 usegholt =) Ja denn simmer wiitergfahre dur d Nacht bis kurz vor Miami, hend wider bi de Restarea pfuset und sind den am morge früeh uf Miami ine. Es het so en Toll High way womer dene chli Bazzeli muss abgää, s aber schneller und besser seg - mir sind per zuefall det druff cho & prompt hemmer wider en Unfall erläbt mit emne Auto wo so öbis vo dahin xi isch :S
Scho d Ifahrt nach Miami isch eifach genial, mer sind ezt da i eusem Studio wo es umgmodlets Hotelzimmer isch mit Kochnische und allne Utensilie womer sich nur wünscht. Mitem direkte Meeresblick vom 9te Stock. Als ersts simmer gad in Wallmart go Grossikauf mache für 200 USD hemmer es riiiisigs Wägeli gfüllt mit de beste Sache womer gfunde hend Total 85 Artikel sinds xi (staht so uf de Quittig, kei angst mer hends nöd zählt). Die hend die härtiste Sache da, mir hend zb. div Drinks us Büteli kauft wie de Pina Colada für 2.- gits es ganzes Glas, und den wiiie fein :) aber hauptsächlich hemmer mal wider chli welle selber Koche und ohni die ewige Emulgatore esse. So hemmer Pasta, Hördöpfel, Pouletbrüstli und Gmües und u feini frischi Frücht etc etc. aso de Küehlschrank isch randvoll :)
herrlich das Meer isch eifach de Traum so klar und frisch und kristallklar, chli Türkis igfärbt.. hammmer, au de Sand, so fiin und breit und flachabfallend :) Ezt eifach mal es Wücheli hänge, bädele, sünnele, chille und fein koche. Ezt staht na de Key West & Everglades trip ah und den hemmers da au xeh ;)
Keine Kommentare:
Kommentar veröffentlichen