13.05.12 - In den Sümpfen der Everglades

Guete Wuchestart zäme! :-)

Am geschtrige Sunntig simmer zerscht wiedermal gaanz stockend usem bett usecho. Nachem Blick usem Fänster isch das ganze au klar gsi. Es hät gwindet und isch bewölkt. Also nöd ganz Badewätter, obwohl mer bi de Temperature locker hett chönne is Wasser hopse.

Drum hämmer nacheme Kaffi und ere Schale Froot Loops dänkt, mer gönd hüt uf Alligatore suechi i de Everglades, de Sümpf südlich vo Miami. Auto gholt losgfahre, Kamera vergesse, wieder ufegrennt und nomal is Auto gstige und dänn au würklich losgfahre.

Im Internet isch vill vom "Tamiami Trail" und em "Loop Road" gstande, dases deet vo de Urechse nur so wimmlet, und dasmer ufem Loop Road gänzlich d'Natur umsich hät, d'Strass segi au dementsprechend unbehandlet und nur miteme 4x4 befahrbar. Aber egal.

De Tamiami Trail fangt scho in Miami a und gaat quer dur Südflorida entlang amene Kanal bis uf Everglades City. Er isch sozsäge en Querschnitt zwüsched em Everglades Nationalpark und em Big Cypress Park.

Nach es paar Rägegüss hämmer di erschte Schilder gseh mit Airboat Toure dur de Sumpf. Aber de Loop Road seg erschtens Gratis und verspricht gradsovil Natur. De netti Ranger vom Airboat-Stand hät eus dänn au gnau erchlärt womer duremüend. Bim wiiter fahre hämmer au grad de erschti Alligator gseh im Kanal am sünnele! Dänn wiiter simmer bim Visiter Center ufen Holzpfad go laufe womer au jenschti wildi alligatore gseht.

Nacher simmer dänn in Loop Road inegfahre und am aafang scho es bitzeli skeptisch gsi. Es hät scho gholperet und bi de Schilder isch vermerkt gsi, Last Chance To Turn. Aber egal mer sind wiitergfahre und es hät sich echt glohnt.

Mer händ all 40-50 Meter en Alligator gseh im Jungel vo de Everglades. Dänn isch i de wiiti no öppis über d'Strass gloffe, womer zerscht dänkt händ hä? Isch das e Chatz? Dänn isch nomal öppis hinedri gwagglet, und nomal, und nomal. Okay los langsam fürefahre und das ganze go aaluege:

E Waschbär Familie mit jeenschte chline Waschbärli isch gaanz locker a eusem Auto verbii gwanderet :-)

Nacher hämmer no e Geier-gang gseh wo de ganz Baum bsetzt hät und jeenschti ander Vögeli. Ganz am Schluss isch eus no e Wassermokasin, oder Cottonmouth, eini vo de Giftschlange i de Everglades über de Wäg kroche. Riesig! Sicher 1m80cm, sehr iidrücklich und pechschwarz.

100 Meter nach dere begägnig simmer andere Schuel verbiigfahre... enere Schuel i de Everglades :-P

Ja das wäred so chli d Highlights gsi! Bis Morn.