21./22.05.12 - Rocket Launch Success!

Es isch eifach soo fasizinierend, wasmer alles chan gseh. Am geschtrige 21. Mai simmer wieder im Jetty Park aacho und händ als erschts grad dörfe e Manatee (Seekuh) beobachte, wie si vor eusne Füess verbii schwümmt! Aber was fascht no faszinierender gsi isch, sind springendi und spielendi Delfine i de Bucht und im offene Meer gsi. Mer händ die Tier dörfe vo eusem Auto direkt am Pier beobachte. Mer händ dänn euse Silverstar wieder zunere Übernachtigsmöglichkeit umgmodlet. Nach es paar interessanten Gspröch mitem Nachber und sim alte Chevrolet hätter eus dänn au no grad es paar lebendigi Köderfisch us sim Kofferrum gä zum fische.

Wiiter simmer dänn no is Gspröch cho miteme Kanadier, wo au für de Ragetestart deete gsi. Die händ dänn chli verzellt über di kanadisch-amerikanische Beziehige, Key West, s'Goverment, de Chrieg etc. etc.

                                        (Bild Quelle: Google)

4 Stund vorem Abschuss simmer dänn nomal chli go schlafe. Womer am 03.15 dur de Wecker uufgwachet sind häts e rächti Mänscheaasammlig gä am Pier, womer vorher fascht elei gsi sind.

03:40... mer sitzed as Pier und gsehnd all Lüüt mit ihrne riese Foti- und Kamerastativ.

03:41... es wird live-Radio gschaltet mit de Sprächer vo de Nasa

03:42... langsam lueged all Lüüt i die richtig Richtig ums ja nöd zverpasse..

03:43... No 10 Sekunde, mer ghöret hinder eus im Huus vom Radio und vom Dach d'Lüüt zähle

Nine...Eight...Seven...Six..Five...Four...Three...Two..One...Lift Off!

Es richtig richtig hells Liecht erstrahlt überem Cape Canaveral! D Ragete startet wiene chlini Sunne richtig Himmel. Nach ca. 1 Minute ghöremer de verzögerti Schall und die unglaublich Luutstärki vo de 9 Triebwerk! Es Rumored richtig, rede chammer nümme...

D'Nachbrenner fanged aa zünde und mer gseht en richtige Schweif vo de Ragete, es gseht fascht us wienen Komet. Nach gschätzte 2 Minute findet de Iitritt is Weltall statt...es isch nurno es chlises Liechtli übrig vo de Ragete, wie en Stern und es runds wiises Loch vom Iitritt...100 Kilometer über de Erde... wämmer sich das so vorstellt... im schwarze tüüfe All, unglaublich. Di erschte Benzintänk werdet abkappt und gheitet zrugg ufd Erde, verglüehet i de Atmosphäre und sind schlussendlich au weg.

D'Lüüt jublet und klatschet, es Wahnsinnsereignis! Rocket Launch Success!

Mir gönd zrugg is Auto zum revue passiere lah und nacher iischlafe.

Hüt Morge ufgwachet am 10i und no gschnäll ab is Meer, Morgebädele :) Dänn under d'Duschi am Strand. Als Morgehighlight isch dänn au no grad es Uboot vo de Navy in Hafe ine gfahre und natürlich begleitet vo Boot vo de Marines. So, ab is Auto, Bye Bye Florida, Hello Georgia, Savannah isch aagseit.

Es folget no Bilder und uf jedefall s'Video vo de Ragete!