20.05 - 21-05.12 Orlando, Daytona Beach

Nachdem mer s Hotelzimmer den z Orlando 3 mal gwächslet hend und es wunderschöns becho hend ;) hehe simmer am morge na an I-Drive (International Drive) wo sich alles für d Touris abspillt. Es het jensti Hotels, Restaurants und crazy Läde... aso eigentlich würklich nur für de Tourismus erstellt. Aber mer fühlt sich wohl und es würkt uf ein i, wie e chlini science fiction wält. Es het unteranderem es riiiisigs Convention Center (Usstelligskomplex à la Expo) wo diversi lustige Conventions stattfindet. Da mer so nöch wie möglich an Shamu hend welle, simmer na richtig Sea World gfahre, ja nur hemmer d Ifahrt fürs Parking wo 14 USD kostet verwütscht :) Mer hend den erklärt dasmer eigentlich gar nöd inewend, den hemmer es zätteli mit Exit becho, passiert wohl na mehrere. Uf all fäll hend die en XXXXL Parkplatz und d Bahne hemmer chöne erblicke. Denn simmer na zu de Prime Outlets gange, wos jensti Markeläde het. Die einte sind würklich günstiger wie zb Adidas, Nike isch so zimmlich glich tür wie i de andere Läde da, klar immer na mega günstig für eusi Verhältnis. De Dickies Lade zb. isch tüürer als wemmer im Wal Mart e Hose kauft.. das chas doch nöd sii oder lüüt? Ja det isch de Parkplatz chli chlinner und sehr viel Autos suechet na es Plätzli, mir hend da grad meega glück gha und hend eis gfunde.

Nach dem Mall bsuech simmer uf Daytona Beach gfahre womer s Hotel direkt am Meer mit Pool buecht hend. *herrlich das läbe da*

Am Abig simmer ad Strandpromenade füre wos en chline Rummelplatz het mit Riiserad und sustige Bähnli, isch na schön xi. Denn hets e Shoppingmall wo eifach so dastaht, gar nüt schöns oder bsundrigs.. eifach für all die Springbreak bsuecher schnell hereghaue. De Strand isch ziemlich natürlich ghalte, aso nöd mega schön oder so, s isch extrem windig & wällig s Meer, am morge hets viel Surfer. Denn hemmer natürlich d Rennstrecki na xeh - thats it. Ezt gömmer wieder zrugg zum Cape Canaveral go hoffentlich de Raketestart mitzerlebe :) drucket de Duume, dases dasmal abgaht.