30.04.12 - San Diego Day 3

De San Diego Zoo isch hüt so ziemlich s'ganze Tagesprogramm für euse letschti Tag in San Diego gsi. Nacheme Morgeässe im MC simmer in Parkplatz vom Zoo inegfahre und de isch verdammt gross. De Zoo isch au eine vo de gröschte uf de Wält. Es hät ziemlich vill Kids / Schuelklasse gha. Für das, dases en Mäntig isch isch de Zoo eigentlich volle gsi.

Im Zoo sälber häts alles was mer wot gseh, und no meh. Über 4000 Tier, 800 versch. Arte, es Seilbähnli, Express-Büss, Tourbus und sogar e Rollträpe findet mer ufem Areal.

Als erscht simmer per Zuefall ine chlini Show inegloffe, wo Papageie, Hünd, Wölf und au en Gepard d'Stars gsi sind. Für d'Goove en mega Hit :-)

Ja de ganz Zoo isch sehr Chinder und Schuelfründlich uufbaut, mit villne Infos und Beschribige zum jewilige Tier. Mer gseht au ufere Skala öb die Art vom Uusterbe bedroht isch. De Zoo isch eine vo de wenige, wo au Pandabäre füehrt. De Bestand vo dene tier isch wältwiit no ca. 1'500! Süscht händ Bäre, Wölf, Elefante, Tiger, Giraffe, Orang-Utan und und und.. es paar Bilder für eu!

29.04.12 - San Diego Day II

Wecker... Wecker??! Ernsthaft - isch das euse Wecker? Jap, it was. Da mir so eusi Ferie am gnüsse sind, und ehrlichxeit kei ahnig hend, welle Tag das grad isch - lütet amix so um di 9ni euse Wecker ;)

Ufem Plan wer eigentlich de Strand gstande - la Jolla oder Ocean Beach, weder noch hemmer abcheckt. S isch so bewölkt und windig xi dasmer eus entschloss hend es z Morge im "Old Town" z neh, das isch en Stadtteil chli usserhalb wo na vo früehner bestaht, wos chli ufgmotzt hend mit villne chline Restaurants und Verkaufsstelle im Mexikanisch-Indianische Styl - seehr charmant, het eus guet gfalle.




Nachemne happe, simmer mitere Dame is gspröch cho, wo für Obdachlosi Geld sammlet, debi hemmer recht vil vo ihre und de allgemeine Zueständ erfahre. Sie isch sehr ufgschlosse, offe und ehrlich xi. Sie isch au Obdachlos und sammlet Geld für die Organisation, sochli als Jöbbli damit sie chli Geld chan zemespaare zum Neuafange. Sie het verzellt, dases da au Uffangstelle für all Obdachlose git & das halt vil die Hilf ned wend aneh, will sie sich denn a Regle münd halte und lieber eifach chli umesüüchet  und vor sich hii plegeret... s isch truurig, aber glaub s System isch recht ähnlich wie bi eus ide  Schwiiz, die wo würklich wend usecho - die packet das mit de Hilf vo dene Organisatione... "wo ein Wille ist - ist auch ein Weg".

De Weg het eus denn zum Balboa Park gfüehrt. En riesige Park direkt hinter eusem Motel ;) Mitemne gratis Shuttlebus Service, chammer de erst idruck vom Park gwünne, womits bi eus gstartet het. So simmer bim Japanische Fründschaftsgarte, de Bonsai-usstellig, em Botanischgarte und allem drum & dra inkl. de Konzerthalle xi.

Nachemne chline Nickerchen simmer namal uf Downtown gloffe und sind zum 2te mal is Westfieldshoppingcenter sowie is Kino. S sind riise Sääl, womer eifach es plätzli wo eim passt chan neh und s kostet halb soviel wie bi eus. Wer hunger het zahlt allerdings glichviel für d Popcorn wie bi eus, nur chammer da e XXL Portion erwarte mit na extra Buttersossä :) S kulste isch natürlich nach wie vor d Filmvorschau und die kreative Werbige, da chönd sich paar lüt en Schiibe abschniide =) Ja, denn hemmer euse Abig bimne Billiardbattle usklinge la und natürlich en Big Mac inkl. side salad.

Morn hoffemer uf es sunnigs-ufstaah, aber mer gönnet euch natürlich das Summerfeeling ide Schwiiz.

28.04.12 - San Diego Day 1

San Diego...Yeeeah!

Mir sind hüt Morge am 10i uufgwacht und händ eus überleit, öbmer in berüehmte Vergnüegigspark "Six Flags" gönd. Aber irgendwie hämmer kei luscht gha dur de ganz Chueche und Stau vo L.A. z'fahre, drum hämmer beschlosse, wiiter uf San Diego düse. Nachem uuschecke simer uf de Highway und nach gschätzte 100m wieder links iigschlage.

Mer händ es paar chlini Zält und Ballöön gseh, und spontan beschlosse eus das e chli gnauer aaluege. Es isch dänn en wüchentlich am Samschtig stattfindende "local farmer market" gsi :) Alles Buure mit ihrne Ständli wos Strawberrys (Erdbeeri), Peaches (Pfirsich) und anderi Bio-Produkt verchaufet. Mir händ dänn en Öpfel und e packig Erdbeeri kauft. Vorher simmer aber no an Strand vo Huntington Beach direkt überd Strass. deet e chli is iischalte Wasser gstande und die heiss Sunne gnosse.

Nacher isches wiiter gange nach Oceanside, es Dorf oberhalb vo San Diego. Deet simmer au no es paar Stündli an rächt beläbte Strand gläge. Würklich Seelebalsam das Strandläbe... :)

Vor de Wiiterfahrt simmer ine neui Fastfood-Bude... "Wienerschnitzel" heisst die und verchaaauft:...Hot Dogs -.- haha genau Hot Dogs und Hamburger... aber di heisse Hünd sind würklich nöd schlächt :P

Nachere Stund 7-spurige Autobahn simmer i euesm Motel in San Diego glandet. Es befindet sich direkt am Balboa Park und ca. 15min. Downtown weg. Nachem iichecke simmer id Stadt und händ gmerkt dases ziemlich relaxt zu und her gaat. Mitere fine Pizza bim Italiener hämmer euse Reisehunger gstillt. Mer fühlt sich nirgends unwohl und es isch nienets dräckig. Ein Typ hät e chli umegschreit i de Stadt, aber de hät entweder es Burnout vom schaffe, oder hät e chli vill Droge gschmisse, aber das kännt mer ja au in Züri...:P  Nöd umesüst ghört die 8-gröschti Stadt vo de USA zu eine vo de 6. sicherste Städt.

Am Hafe une isches no schöner! Nachem Sunneundergang simmer chli am Pier entlang gloffe und händ eus no en Kaffi und es Cookie gönd. Überall Schiff, Wiese und Läde. Aber überhaupt nöd hektisch. Das gfallt eus so sehr, dasmer grad 3 Nächt bliibet.

Morn gaats uf grossi Entdeckigstour in "Surf City".

Bliibet dra

27.04.12 - Los Angeles

Nachere super gmüetliche Nacht simmer am morge friedlichst am 10ni ufgstande und mitem Auto richtig City z fahre... rsp. mer hend eus entschide direkt bi de Warner Brothers Filmstudios verbiizgüxxle. So simmer dete denn acho, hend de Charre an Strasserand gstellt wie sich das da ghört und hend de igang gsuecht... und gsuuuecht.. und sind bim Gate 4 gstande, wils da so schön nach Igang usxeh het.. de Manu het es filmli gmacht, da meint plötzlich eine, mer döf da nöd filme.. hehe alles top secret!! Ja de Igang isch ca. 2km am andere ändi xii ;) tja so verbrännemer jewiils die geile Burger vom In & Out Burgerschuppe. Bim korrekte Igang hend eus denn all mega flott begrüesst, krass wie  ufgstellt die Agstellte sind - chönd sich einigi bi eus es Biispil nääh ;) Es het den gad e Tour gha für eus, dh inecho buecht & ab die Post. Es het agfange mitmne Filmli so es intro was si so machet & wer sii so sind.. Denn hemmer en Guide becho, wo eus den mit somne chline Wägeli innere 8ter Gruppe dur die Verschiedene Dreh-Orte (rsp es isch sozäge wüki immmmmer s gliche ufteilt uf Diversi Studios und die paar Strasse) gfüehrt het. Er het den zu jedem sochli verzellt welli Szene us wellem Film oder Sitcom das det drüllt worde isch - isch meega spannend xi, da ei Huuswand ca. für 5-7 Serie gnutzt wird es wächslet jediglich vo Bakery zu Library oder so.. s Highlight isch sicher xi, das mer d Location vo Friends mitem alte Sofa döf aluege & pix mache, oder dasmer die ganz Kulisse vo The Mentalist xeht, zudem hemmer na döfe s Studio vo Ellen go aluege, das seg au ned immer i de Tour debi.. jedoch da Fritig xi isch  - hets gad kein Dreh direkt vor Ort gha, aber mer chan ja nöd alles ha. D Tour het na es Museum mit Requisiten und äs riise Gebäude mit so Gägeständ à la Vasene i allne erdenkliche Farbe & Forme, wo chönd usglehnt werde beinhaltet. Nach 2h30 isch denn aber fertig xii.. chas eus nur empfehle!

So wiiterfahrt dur e wunderschöni riichi gägend in Richtig Hollywood Sign - here we go:

 

Denn simmer an Hollywoodboulevard go d Sterndli aluege :) und zum Kodak Theater (Shoppingcenter) und zum Graumans Chinese Theater, wo jeglichi Stars sich für de Support bedanket & d Händ igüsse la hend.

Nachher simmer de Sunset Boulevard durab gfahre und denn hemmer de Rodeo Drive na gsuecht, aber bim Fiirabigverkehr ischs eus z blöd worde, drum simmer nachli an Venice Beach... au so chli en multi kulti freigeist egge, mit vilne individuelle Mensche wo zemetreffet. Sust isches voll friedlich dete am Tag wenns hell isch - mer wend nöd wüsse was nachher dete so abgaht, seg z miide bi Dunkelheit...S isch echt genau winers kennet vo de Amerikanische Films, s so die Strasse im Sand womer chan Velo fahre oder Inlineskate, es het en Park für zum Skate und gaaaanz viil Shops und natürlich dene Lifeguardhüüsli und wunderschöne Palme und emne meega breite, fiinsandige Strand inkl. es paar Surfer.

 

Ezt simmer gad zrugg im Motel am abchecke womer als nächsts hiigönd & obmer in LA id Six Flags söllet oder igendwo sust :)

24./25./26.04.12 - San Francisco Day 4, Monterey und Los Angeles

So mir entschuldiget eus wiedermal für die paar Täg "wieso schriibeds nüüd meh?", oder "etzt lönds langsam nah hä", aber defür hämmer es paar knallhärti News!...meh oder weniger :P

Also de letschti Tag in San Francisco hämmer eigentlich locker gno. Am Morge simmer i euse erscht Laundromat go chleider wäsche. Mir händ ja churzfrischtig no euses Motel gwächslet und sind a de Lombardstreet glanded, e ganz feini Gägend. Nachem mer chli durd Chestnut Street gloffe sind, simmer euse Z'mittag go hole, es 12er Pack Taco-Bell "Soft Tacos", mmhmmm Yummie!

Nacher isches no a di bekannti Hippie- und Beatnicks Strass gange. Alles chli lockerer, musikalisch- und farbiger... ebe d' "Haight-Street". Uf die Strass folgt de Golden Gate Park. Au sehr easy zum here-hänge und chli gnüsse. De Wind in San Francisco machts eim amigs aber au bi blauem Himmel nöd liecht.

Am Abig hämmer eus mitem Steve am Union Square troffe, um zäme go Ässe. Das hämmer dänn au gmacht im Lori's Dinner direkt am Union Square im Retro-Stil. Nacheme Big Lori's Burger, Double Up with Cheese, isches dänn zu de Cheesecake Factory gange.

 Best Cheesecake! De Lade lauft wie gstört... zerscht mal de Pager in Empfange neh, und 15min. warte. Sobald das Teil vibriert, zum Empfang, und mer chan Platz neh. I de zwüscheziit eifach emal alli Sorte vo Cakes aaluege wos händ zum d'Vorfreud erhöhe:

• Fresh Strawberry
• Hershey®'s Chocolate Bar Cheesecake
• Ultimate
  Red Velvet Cake
  Cheesecake™
• Reese's® Peanut Butter Chocolate Cake Cheesecake
• Piña Colada Cake Cheesecake
• 30th Anniversary Chocolate Cake Cheesecake
• Godiva® Chocolate Cheesecake
• White Chocolate Raspberry Truffle®
• Fresh Banana Cream Cheesecake
• Adam's Peanut Butter Cup Fu
• White Chocolate Caramel Macadamia Nut Cheesecake 

Echt cool. Mit vollem Mage, also würklich voll, isches dänn no ine Bar gange am Union Square mit coolem Sound und Blick uf d'Stadt zum die ville Kalorie wieder e chli weg z'tanze und ganz by the Way uf min 22igschte aazstosse =)

 De krönendi Abschluss hät d'Uussicht uf d Stadt bi de Hügel "Twin Peaks" gmacht. Spaat i de Nacht all die Liechter... das haut ine... guet die paar Bierli merktmer au no chli, aber Twin Peaks isch würklich iidrücklich!

Mitem Auto simmer dänn no zum Steve heigange zu sim Host-Daddy Daniel. En 42jährige ewige Partyboy.

Am nächste Tag häts eus zu de Outlet-Stadt Gilroy südlich vo SF zoge, womer schiins super chan Shoppe. Es hät 4 Komplex, rächt gross mit jeenschte Marke. Aber die Priise sind eigentlich glich wie i de normale Läde.. also für mich nöd sehr interessant. Aber a alli Fraue... ich wot eu d'Freud nöd neh, ihr händ deet d'Möglichkeit für stundelangs (Window)-Shoppe, Kaffi trinke und eui Kreditcharte strapatziere! ;-)

Nach Gilroy isches uf Monterey, es wunderschöns Städli am Meer. Mit schönem Pier und Hafe etc. Wägem rägnerische Wätter isches aber nöd gross zur Gältig cho. Deet hämmer ei Nacht verbracht.

 

Am hütige Dunnschtig hämmer d'Richtig Los Angeles iigschlage. Das isch die bis jetzt schönschti Route, womer jee gseh händ. Highway Number One nännt sich die schön Strass.

 

  A unzählige Buchte verbii, näblige Waldabschnitt mit Redwoods (ähnlich wie Sequoias, nur grösser) und See-Elefante-Stränd verbii gfahre, simmer dänn nacheme Zwüschehalt zum d'Robbe fötele in Santa Barbara aacho. Deet chli an Strand chillt und d'Sunne gnosse.

 Jetzt simmer in Los Angeles, aacho, und dänn morn ready, zum die Zwielichtig Stadt abchecke. Und was jetzt die knallhärte News sind? Underwegs ein riise Crash und eis Huus wo brännt hät... ebe gsehnder ;-)


Bye Bye

22.04.12 - San Francisco Day 3

Hüt morge simmer voller Vorfreud ufgstande, denn de Bsuech is Alcatraz isch ufem Plan gstande.. nach summerlicher ikleidig, hemmer den schnell gmerkt wie windig & küehl dases dusse isch - so hemmer eusi Jeans wider müsse füresueche *seufz* Nachere stärkig im MC simmer mitem Bus ad Fishermans Warf gfahre, womer s Ticket gholt hend und scho ischs losgange mitem relativ grosse Schiff übere zum Alcatraz. Det acho ischs den eeeeeeeecht windig & kalt xi, und extrem neblig, hesch fast nöd uf d Stadt übere xeh. Mir hend den a de Audiotour teilgno womer na echti Stimme & Erläbnis vo ehemalige Insasse ghört het, das isch so was vo idrücklich... mer hend au id Zelle ine chöne und s isch eim zeigt worde, wie paar hend chöne usbräche.. mit Löffel hends löcher grabe und mit Seife hends es Gsicht nahkonstruiert & under d Decki gleit, damits kei Verdacht schöpfet.. es paar hends gschafft, es paar sind versoffe & es paar vermuetets in Süd oder Mittelamerika...

 

















Denn hemmer innere coole Sportbar, wo gad LA Lakers gege Oklahoma City gspillt het, d Stimmig und es feins Ami-zmittag gnosse. Wiiter simmer chli dur de Fishermans Warf spaziert und hend na d Seelöwe begrüesst :)

Mit somne lustige Tram namens Muni, simmer zum Castro gfahre - wo sich die homosexuelli Szene abspillt. Es het sehr vil schöni Lädeli und Restaurants dete, isch aber nöd so gross wie agno.
Im Castro selber isch es nostalgischs Kino wo de Manu & de Stev na en alte James Bond film sind go luege.

So, our day is over... enjoy working :)

21.04.12 - San Francisco Day Nr. 2

 

Ohhha ja Ohh ja hüt morge bin ich früeh us de Fädere um mich mitem Stev und sinere Kollegin in South San Francisco z'träffe. Es isch nämlich e Classic Car Convention gsi. Alles alti Chärre abem 35er Jahrgang bis zu Ford Mustang 66er, 67er Chevy Impala und und und... En Cadillac Seville, richtig uufgmotzt hät s'ganze Areal mit Sound versorgt. D'Lüüt sind am Bier trinke gsi us de Kofferrüüm vo ihrne Pick-ups und am BBQ gnüsse. Prompt simmer au no ufes Corona iiglade gsi, d'Stimmig? Wie imene Los Angeles Gangster Film, aber alles cool..

Während dere Ziit sind d'Mädels is Westfield Shopping Center, wiiter ischs gange in Alamopark und denn had Haight street zu de Hippies - det ischs kul hets voll vil so alternativi Shops, und au wider en riiisige Park... denn hemmer eus im Japanese Town troffe und sind det chli umeglaatschääääääääääät.

 

Im Japantown isch grad s' Cherry Blossom Festival (Kirschblütenfest) gsi, eigentlich meh es Food Fesival. Nach dem simmer ad Golden Gate Bridge, s'Wahrzeiche vo San Francisco. Es isch en rächte Wind gange, aber s'Wätter isch wiedermal Bombe gsi. Ahja, drum söttmer au luege, dasmer sich iicremt, und kein Sunnebrand bechunt.... Nacher simmer mitem Cable Car uf Downtown abegfahre und wieder richtig Motel gange.

Seeya tomorrow