02.04.2012 - Na endlich, Vancouver!

Sooo nachem letschte 5-stüdnige Flug simmer hüt Abig au ändlich a eusere Zieldestination Vancouver aacho. Mitem Skytrain gaats au direkt zum Hotel Ramada, wo's sich au schön läbe laat. Bim iichecke simmer fründlich empfange worde und sind dänn au grad direkt is Zimmer, eusi Sache go ablade.
Spontan entscheidemer eus, de Autochauf uf morn z'verschiebe (wills ja eh z'spaat isch) und mached en chliine Trip dur s'gmüetliche Vancouver (hämmer dänkt...).

Naja am Afang simmer anes Paar Sache verbiispatziert, wo würklich beidruckens sind. Es wäred da zum Biispil d Rogers Arena (Ice Hockey), dänn S BC Stadium (Am. Football etc.) und s Chinatown miteme berüehmte chin. Garte oder s'Harbour Center mit em 360-Grad Lookout uf d'Stadt (Bild).

Okay alles schön und guet, aber womer in Chinatown links abboge sind, simmer ines Gebiet cho, mit würklich sehr villne Obdachlose. Es isch erschreckend wievill Mittellosi Lüüt in Vancouver "läbed". Und dass sich Droge und Prostitution mitziehnd isch dänn ja selbsterchlärend. Sehr schad wiemer findet, es zerstöret eim ganz ehrlich grad e chli di romantisch Vorstellig womer hät, aber tja, that's life!

Bim zrugglaufe hämmer eus Pizza gönnt. Es grosses Stuck für C$ 1.75, not bad, mues de Manu schonomal eis neh ;-)

Okay es isch wieder en lange Tag gsi und morn gaats erscht richtig los; Mir chaufed euses Auto wo eus sött dur di ganze Staate, Provinze, Berge, Steppe, Städt etc. vo Kanada und Amerika bringe.. mer werdets gseh :-)