12.04.12 - Bryce und Zion Nationalpark

Aaaalso wo sölli aafange, was isch hüt alles ufem Programm gstande...puh...

Am Morge früeh simmer vonere schneebedeckte Landschaft überrascht worde. Also zum nomal churz hinefürehole, geschter hämmer eus alli im Arches Nationalpark i de Wüeschti verbrännt, und hüt wotsch vier Schritt zum Auto mache zum dis Reisegepäck inerüehre, und scho schlotteret dini Zäh..

Mit de Heizig ufem Maximum und gueter Luune gaats etzt also richtig Bryce Canyon Nationalpark.Vorher gits aber no en z'Morge mit: TADAA Vollkornbrot!! für 6 Dollar...isch scho klar das d'Amis da en ganze z'Morge bim Mc Donalds für 5$ inehaued.. oder? ;-)

Ufere höchi vo 2500m ischs deet natürlich no chälter, aber das tuet de wunderschöne Natur kein Abbruch. die erodierte, also dur Erosion, entsandene Sandsteisüüle sind eifach de Wahnsinn.

De Iidruck chamer uf keim Föteli biibhalte. Es git Viewpoints (Ussichtspünkt), wo frei vo jeglicher Sicherig sind, und mer staht so z'säge direkt am Abgrund.

Dur di stetig Bise chamer aber nöd z'lang a eim Ort blibe, so simmer no chli umegloffe, supercooli Föteli häts gä und wiiter ischs gange.

Nach ca. 2 Stunde fahrt simmer bim wieder wesentlich mildere Zion Nationalpark acho. D'Strasse wächslet bim Parkiigang vo grau uf dunkelrot... das git en super Effekt mit de Landschaft, da d Felse vom Zion vill Ise enthaltet und dur das au rot sind. De Park isch nümme ganz mitem private Auto befahrbar. So händ di Verantwortliche es Shuttlebus-System iigfüehrt um d'Natur nöd unnötig mit villne Autos z'belaschte. Mer chan da ii- und uusstige sovill mer wot. Mir sind dänn zwei chlini Spaziergäng go mache. Bim einte hämmer chöne e Quelle betrachte, und bim andere simmer bis zumene Ort cho wo sich zwei gigantischi Felsmassiv träffed und veränget. Deet gits au bi vill Räge regelmässig Überfluetige und dänn au nöd begehbar isch. Ufem wäg deethi häts einigi "herzigi" aber au bissigi, wie alli Schilder warned, Eichhörndli gha. Es paar Reh händ dänn au no friedlich ihres Mittagässe vor es paar Schauluschtige und Fotografe gnosse :-)

Nach dene schöne Iidrück ischs au scho wieder zrug gange zum Auto, und mit dem dänn i Richtig Lake Powell, zum Städli Page. Jetzt simmer da acho und händ grad es Zimmer imene sehr schöne Motel chöne überneh, da de Gast wos buecht hät, verhindert gsi isch. Dezue anne hämmer au no e Stund gunne, da mer vo Utah - Mountain Time in Staat Arizona, jaa wie de Ice Tea, zu Pacific Time gwächslet händ. Morn gaats ab zum See, was a dem speziell isch, läseder Morn ;-) (Oder ihr suecheds in Wikipedia, aber das wär ja voll lame...:P)

Ah PS: De Tachometer funktioniert wieder, aber nur wänns Auto nöd heiss hät :P