13.04.12 - Glen Canyon & Antilope Canyon & Lake Powell

Hüt simmer friedlich bi de Reception go z mörgele, det simmer uf di originale Fruit Loops gstosse - mmmjam! Denn hemmer eus chli informiert, wie wenn wo dasmer de Antilope Canyon chan go aluege, mer hend denn erfahre dases nur gfüehrti Toure git... euse Trip hemmer den uf die 15h buecht mitere Gruppe. Zum Ziit vertriibe simmer in Safeway, das isch so en XXL Store wommer chan ässe poste, det simmer chli go umeschnoiiige hend aber nix kauft... wiiter ischs gange zum Glen Canyon Staudamm, det simmer is Visitor Center und hend eus über d Entstehig informiert - das isch voll faszinierend wie die das alles konstruiert und erbaut hend.

Denn simmer an Lake Powell gfahre, det simmer sehr flott begrüesst worde vomne Herr in Uniform, er het eus gar nüm welle la ga - ischem wohl chli langwilig xii :) S'Wetter isch nöd soo de hammer, bewölkt und starke Wind mit chli Regeschauer. Mitem Auto simmer chli umedüüset, hend bi paarne Viewpoints aghalte, s het eus aber nöd us de Socke ghaue... So simmer wider uf Page is Dörfli und a sonere lange Strass entlang gfahre wos mindestens 6 verschidnigi Chille nebetenand gha het. Zum Ziit bis am 3 verwiile, isch de Manu na zum Höörlidieb... im Coiffeurlade hets en Indianer gha wo sini Schulterlange Haar (1.5Jahr wachse lah) eifach uf en Churzhaarschnitt  abghaue het, das isch mal was. Guet wiiter ischs gange in Taco Bell, womer meeeega günstig geili Burritos, Tacos und Nachos bechunnt. Denn hemmer so en Lade gfunde wo bi eus chli isch wie en Jumbo, det hemmer chli Chinderspiilsache postet wie z.B. es Yoyo, es Pistöleli und es Spicksegelflüügerli und en XXL Kaugummi het au müsse sii:)

Endliich 15h, abfahrt zum Antilope Canyon i somne lustige Auto mit ca. 9 Lüt & eim Guide, s lustige isch xii das eus sini Frau dur d Wüesti gfahre hett... das isch eh de hammer ;) Mer sind den 15min us Page gfahre und na 3miles dur d Wüesti bis mer acho sind. s'2te Auto hemmer den vorgaa lah, det hets nur Japanerli dine gha :) So simmer vo eusem Guide dur die Felsgebirg gfüehrt worde, er het eus zeigt vo wo wenn wie was dasmer s beste Bild chönd mache, den simmer duregloffe und wider zrugg, hend dete d Ussicht gnosse und d Iidrück walte laah. Das ganze isch 1.5h gange und het eus USD 35 kostet ;) And right now we are i somne Käffli vorem Monument Valley, womer im Motel fast s gfühl het es blaset eim s Dach überem Kopf weg... * good night desert *

PS vom Herr K.: Boxe im Free-TV.. super Kämpf ! ;-)