08./09.04.12 - Grizzlies und Wölfe

Hello Guys -  wie schön euch wider uf eusem Blog azträffe :)

Au mir hend Ostere gfiiret & zwar na id em super Motel in Deer Lodge mitemne Eiertütsche & de Manu het eus natürlich all gschlage - en gruess a dere Stell an Jürg, das heschem guet biibracht!

 Los simmer gange in Richtig Yellowstone National Park, wommer eus na gfrögt hend ober echt scho offe het um die Ziit... und siehe da - mer sind doch glatt 2 Wuche z früeh dra, ja nu mir positive Lüt hend den eifach die offnig Nordstrass gno & de erst Stopp bi de stinkende Schwefelquellene gmacht.

Wiiter simmer den in Park inegfahre wo eus scho die erste paar Tierli begrüesst hend - euse Herr Biologielehrer Kilchenmään het eus denn alles erchlärt. Ca. 3h isch d Fahrt richtig Cook City gange, womer di ganz Ziit ussicht nach Wölf, Bäre, Elche, Antilope und Bissons ghalte hend.. die muetige Bissons sind den au eifach z mitzt uf de Strass gstande & hend ufs föteli welle :) leeego miooo isch das e suuper erfahrig xii :)

 
Mer hend den in Cook City übernachtet, und na e ganzi Crew atroffe wo dete so Motorbike filmli & stunts etc gmacht hend - und wie d Amis so sind simmer bim Z mörgele (wos en super geile Waffelmacher gha het, Nilla das isch DEE Traum!!) is gspröch cho.

Nach de Rückfahrt so um di 8:30h am Morge hemmer den bi so Ussichtspünkt aghalte und hend es Paar Wildhüeter atroffe wo mitere ganze Usrüstig scho all Tierl im Visier gha hend so dass mir nur na hend döfe herega & sie eus alles zeigt & erklärt hend.. eus ischs aso sehr guet ergange..

mer hend Grizzlies & Wölf chöne durs Fernglas aluege und mitverfolge.  Insgesamt hämmer 3 Grauwöfl chöne betrachte und 4 Grizzlies..massivi Vicher!!

Dur e schöni Waldstrecki wo eus d Manuela gfahre het (danke a dere Stell, sorry aber sie erwartet die usdrücklich offiziell bedankig) simmer den ca. 8h und 2 Tanks später in Salt Lake City by night acho, hend eus es Motel packt & da simmer...