Hi, how are you?
Also jetzt chunt de versprochni Blogg. Mir fanget am 15.04 aa.. womer in Tusayan im Motel am Morge am 05:00 ufgstande sind, zum de Sunneuufgang am Grand Canyon mit z'erläbe. Es isch isch wiedermal e Schweinschälti gsi am so früeh und zerscht hämmer müese euses Auto entiise. Okay, 05:52 isch de Sunneuufgang, also los zum Canyon. Vom Yavapie-Point hätmer di schönst Ussicht, luut em Ranger am Iigang. Obe aacho simmer mit no es paar wiitere Schauluschtige und Fotografe am warte gsi. Halb verfrore isches dänn, wänn au mit es bitzeli Verspötig, ändlich au passiert; D'Sunne hät sich über de Klippe vom Grand Canyon präsentiert.. wie das uusgseht gsender ufem Föteli:
Nach dem wunderschöne Naturspektakel simmer mitem Bus no e chli dur de Park gfahre a di wischtigschte Pünkt. Vo dene Pünkt isch de Colorado-River sichtbar gsi, au super schön. Ufem Wäge häts immer wieder Elks, also Wapiti-Hirsch, gha wo uf Fuetersuechi sind. So hämmer nach dene chalte Stunde us uufgwärmt miteme z'Morge im Dorf.
Di nägscht fahrt hät ca. 4h duuret. Aber das hät sich uf jedefall glohnt!.. LAS VEGAS... di durredrülltischt Stadt womer sich chan vorstelle. Aber als erschts hätmer ja müesse mitem Auto id Stadt cho, und das isch weissgott nöd so eifach bi dem viele Verchehr und all dem hektische Züügs. A dere Stelle müemer vor de Noëmi grad e mal de Huet neh, si hät das super gmeischteret, und eus sicher dur d'City chauffiert!! Zueanne chunt, das mit ja nödemal es Hotel buecht händ. Also simmer zerscht mal ines Parkhus, zum eus chli orientiere, di luschtig Story chunt jetzt:
Wämmer bi de Hotels aafrögt sind Priise jedesmal relativ happig gsi so churzfrischtig für drüü Persone, also für zwei Nächt 200-300$ up! Und gratis Wifi häts in Vegas au nur a eim Ort, und das isch de Mc Donalds :-) Womer bim Imperial Palace a de Rezeption stönd, und dänked, Mischt das wird nüüd mit dene Priise, chunt e Frau verbii und seit mer sölled s'App "Hotels Tonight" abelade, deet hegs Aktione und chunsch d'Zimmer viel günstiger über. Chli misstrauisch hämmer das App dänn no bimene Strawberry-Shake im Mc abeglade. Und Paff!: 91 Dollar im Imperial Palace für zwei Persone/zwei Nächt... Wow! wie gaat das? Egal, iicheckt, Gepäck gholt und is Zimmer gange. Di ilegali Untermietierin Manu hät dänn dank zwei Queensizebett au no es Plätzli gah zum schlafe.
Scho isches ufen chline Erchundigstrip gange. Am negschte Tag simmer di grosse Hotels wie s' Venetian mitem künstliche Venedig, s'Luxor - e fake Pyramide oder s'Cesar Palace, au bekannt dur de Film Hangover go aaluege. Das chamer gar nöd ufeme Föteli iifange, das muesmer gseh ha. Die spinned, die Amis. Au d'Wassershow vom Bellagio isch es Highlight. Und i jedem Hotel häts natürlich Spielautomate, Slot Machines, Blackjack -und Roulettetisch, Craps und und und... also es isch würklich DIE Sin City vo eusere Wält.
Nach zwei Täg zocke, d'Manu hät übrigens ineghaue mit Roulette und ordentlich abgsahnt!! :-), isches dänn wieder us Vegas gange und wiiter zum Death Valley.
17.04.12 - Bim Death Valley aacho hätmer scho s'erschter Wahrzeiche vo dem Ort bemerkt, nämlich d'Hitz. Es isch eine vo de extremschte Ort vo de Wält und chan im Summer locker +50 Grad werde am Tag. I de Nacht chas au bis zu minus Grad ha. Was no sehr speziell isch, a dem Ort vereinigt sich de tüüfschti Punkt vo Nordamerika mit 87m underem Meeresspiegel und em höschschte Punkt vo Nordamerika (usserd Alaska) mit 4421m.ü.M.
Nachem Viewpoint "Dantes View" womer ebe die zwei Pünkt, und au d'Salz ebeni gseh hät, simmer dänn zu de Sanddüne gfahre. Es hät deet überraschend viel Büsch und strücher, wo sich zwüschedinne Reptilie verstecked.
Di Ziit vom Sand i de Schueh isch vorübegehend au verbi, mer händ dänn eu uf de Wäg nach Bakersfield gmacht, e Vorstation vom Sequioa Nationalpark, womer di gröschte Bäum vo Nordamerika chan bewundere. Vo Bakersfield gaats no 2,3 Stündli zum NP, also müemer etzt au los.
Ihr ghöred vo eus!
Keine Kommentare:
Kommentar veröffentlichen