14.04.12 - Monument Valley, Navajo und die Hopi

Hüt isch en spannende Tag gsi. Am Morge simmer wieder bi Schnee und Chälti undeme unglaublich starche Wind, wo dur d'Nacht dure gweht hät und sich de ganz Tag durezoge hät, mitem Auto richtig Monument Valley gfahre.

Da mir ja e Jahrescharte für so ziemlich all Nationalparks gmacht händ, hämmer dänkt, die zeigemer am Iigang und wiiter gaats. S'Isch aber eso, das s Monument Valley kein Nationalpark, sondern en Tribal Park, also vo de asässige Navajo-Indianer betriebe wird, isch und somit 5$ pro Chopf koschtet hät. Ja mir befindet eus imene Indianer-Reservat vo de Navajos und de Hopi.

S'Valley kännet di einte vom Marlboro-Man, de Zigiwerbig, oder vom John Wayne und sine Hollywoodklassiker. Es hät ziemlich markanti Felsmassiv, wo sich usem flache Wüeschtesand erhebet. Dur s'schlächte Wätter hät das ganze aber e chli sin Reiz verlore, und Sandsteisüüle hämmer ja eigentlich au scho gnueg i de andere Pärk gseh.





Im Muesum findet mer eigentlich au nur Touri-orientierti Waar.. also eigentlich nöd das, was mir sueched. En Horse-Trail, es Uusflügli mitem Rössli choschtet au grad no 75$ pro Person und Stund... also way over eusem Budget. So isches dänn au cho, dasmer de Park dänn au bald wieder verlah händ, um eus uf d'Suechi vom Reservat vo de Hopi Indianer z'mache.

D'Hopi händ e sehr spannendi und au truurigi Gschicht. Mir sind dänn mitem Auot de Highway durab bis uf Tuba City, und vo deet bis zum Hopi Reservat gfahre. Bim Hopi-Muesum hämmer Bekanntschaft mitem Thomas Silas gmacht, en 56-jährige halb Hopi, halb Tiwà Indianer. Sehr uufgschlosse, hät er uf eusi Frage über die verschiedene Clans g'antwortet.

Bi dem Gspröch isch usecho, dass sich d'Hopi und d'Navajo eigentlich gar nöd verträged und au scho sit Jahre im Chrieg befindet. De wird hüt allerdings politisch uustreit. Und das im Reservat vill Kriminalität, Droge- und Alkoholsucht (wo au sin Brüeder betroffe isch) und Jobmangel herrscht, so häter au grad verzellt dass nöd wiit vom Muesum e Schüsserei stattgfunde hät, wo en alkoholisierte Hopi ufd Polizei gschosse hät. Er gseht leider kei Zuekunft meh für d'Uriwohner für Amerika. Jedoch häter eus au vill vo de Hopikultur im allgemeine verzellt, vo de Volkstänz Katchima, vo de Töpferei, Chorbflechterei und vom Hopi Dorf in Walpi. Walpi isch früehner die Stadt gsi fürd Hopi ufeme Berg, baut us Sandsteihüser, wo alli mitenand verchnüpft sind. Er hät eus Föteli zeigt vo sinde Grosseltere und Verwandte vor 100 Jahr in Walpi. Doch leider isch das Dorf am zämebräche. D'Lüüt wo deet no wohnet, chanmer a einer Hand abzehle. Drunder isch en alti Hopi-Frau (ohni Heizig und liecht). Di Junge segded all weggange id Städt...

Für alli wos interessiert, gönd uf Wikipedia über d'Gschicht vo de Hopi Indianer go läse, es isch e sehr spannendi aber au truurigi Aglegeheit.

Nach dere Spannende Begägnig hämmer eus dänn no di einte Dörfer aaglueget mitem Auto, womer urtümlichi Behusige mit Neubaute gseht. Bi de Hopi isches strikt verbote zum Fötele, will da dur Ihri Seel klaut wird. Wer das missachtet, setzt sini gsundheit ufs Spiil. De Thomas meint jedoch, solang mer nur d'Hüser vo usse und nöd d'Lüüt fötelet gat das i.O.

 

De wiiteri Wäg hät eus dur de Ostiigang vom Grand Canyon Nationalpark ufere schneebedeckte Strass zum Dörfli Tusayan vorem Grand Canyon bracht. Und de gömmer morn au go aaluege...

Good Night from oversea, eues Traveler-Team :-)